Իրավանի. Անվտանգության խորհուրդը պետք է խուսափի սադրիչ քայլերից
ՄԱԿ-ում Իրանի մշտական ներկայացուցիչ Ամիր Սաիդ Իրավանին քննադատել է Բահրեյնի նախաձեռնությամբ Արևմտյան Ասիայի իրավիճակի վերաբերյալ ՄԱԿ-ի Անվտանգության խորհրդի նիստի անցկացումը և հայտարարել, որ խորհուրդը պետք է խուսափի այնպիսի սադրիչ գործողություններից, որոնք կարող են թուլացնել դիվանագիտական գործընթացը կամ ավելի սրել լարվածությունը։
Հղում անելով Իրանի պետական հեռուստառադիոընկերությանը, Pars Today-ը հաղորդում է, որ Իրավանին հինգշաբթի օրը Անվտանգության խորհրդի նիստում հայտարարել է, որ առաջնահերթությունը պետք է լինի Իրանի և ԱՄՆ-ի միջև ձեռք բերված փոխըմբռնման հուշագրի լիարժեք իրականացումը և համապարփակ համաձայնության հասնելու նպատակով բանակցությունների շարունակումը։
Նրա խոսքով՝ Անվտանգության խորհուրդը պետք է աջակցի այս գործընթացին, խրախուսի կողմերին լիարժեք կատարել ստանձնած պարտավորությունները և զերծ մնա այնպիսի քայլերից, որոնք կարող են վնասել դիվանագիտական ջանքերին։
Իրավանին կտրականապես մերժել է նաև Միացյալ Նահանգների կողմից հնչեցված մեղադրանքները՝ դրանք անվանելով անհիմն։ Նա նշել է, որ ԱՄՆ ներկայացուցիչը հերթական անգամ, փորձելով արդարացնել Վաշինգտոնի անօրինական գործողությունները, Իրանի դեմ կեղծ մեղադրանքներ է հնչեցրել։
Նրա խոսքով՝ բանակցությունների ընթացքում ԱՄՆ-ն Իսրայելի հետ միասին երկու անգամ շեղվել է դիվանագիտական ուղուց և Իրանի դեմ երկու պատերազմ է սկսել, ինչը ՄԱԿ-ի կանոնադրության և միջազգային իրավունքի բացահայտ խախտում է և լուրջ սպառնալիք՝ միջազգային խաղաղության ու անվտանգության համար։
Իրավանին մերժել է նաև Անվտանգության խորհրդի որոշ անդամների և Բահրեյնի ներկայացուցչի մեղադրանքները՝ նշելով, որ դրանցում անտեսվում է Իրանի դեմ իրականացված ապօրինի ագրեսիան, լռություն է պահպանվում այդ խախտումների վերաբերյալ և փորձ է արվում պատասխանատվությունը բարդել տուժող կողմի վրա։
Նա ընդգծել է, որ նման երկակի չափանիշներն ու կեղծավոր մոտեցումները զրկում են այդ երկրներին ուրիշներին դատելու կամ խրատելու բարոյական իրավունքից։
