Հյուսիսային Կորեան չի նահանջում. «Պատժամիջոցները մեզ չեն կանգնեցնի»
Հյուսիսային Կորեան նախազգուշացրել է, որ ՄԱԿ-ի նոր պատժամիջոցները միայն կնպաստեն իրենց միջուկային ծրագիրն ավելի արագ ավարտին հասցնելու գործընթացին, հաղորդում է BBC-ն:
Երկրի ԱԳ նախարարությունից արձագանքել են կոշտ տոնայնությամբ՝ իրենց դեմ կիրառված սահմանափակումների նոր փաթեթն անվանելով «դաժան, անվայել եւ անմարդկային թշնամական ակտ»:
Միեւնույն ժամանակ ԱՄՆ-ն եւ Հարավային Կորեան անցկացրել են համատեղ ռազմաօդային զորավարժություններ Կորեական թերակղզում:
Հյուսիսկորեական ճգնաժամը կդառնա այս շաբաթ անցկացվելիք ՄԱԿ-ի գլխավոր ասամբլեայի օրակարգի առանցքային հարցը:
Պատժամիջոցներով փորձ է արվում Հյուսիսային Կորեային զրկել վառելիքից եւ սպառազինության վաճառքից ստացված եկամուտից, սահմանափակել նավթամթերքի ներկրումը եւ ամբողջությամբ արգելել տեքստիլի արտահանումը:
Սակայն քննադատները կասկածի տակ են դնում պատժամիջոցների արդյունավետությունը, քանի որ Հյուսիսային Կորեան դեռեւս արտաքին աշխարհի հետ առեւտուր անելու հնարավորություն ունի:
Նախորդ տարի այդ երկրի տնտեսական աճը կազմել է 3,9%՝ հիմնականում Չինաստանի հետ առեւտրի շնորհիվ:
Պաշտոնական Վաշինգտոնը բազմիցս կոչ է արել Չինաստանին՝ ճնշում գործադրել Փխենյանի վարչակազմի վրա, եւ դա այն դեպքում, երբ չինացիները Հյուսիսային Կորեայի գլխավոր, եթե ոչ միակ դաշնակիցն են:
Իսկ Ռուսաստանը քննադատում է պաշտոնական Վաշինգտոնին «ագրեսիվ հռետորաբանության» համար:
galatv.am
