Հայաստանն ավելի ակտիվ քայլեր պետք է ձեռնարկի միջազգային հարթակում գերիների ու անհետ կորածների հարցը բարձրաձայնելու համար. ՄԱԿ-ի հայաստանյան գրասենյակի դիմաց բողոքի ակցիա է
Որքան մոտենում է COP29 համաժողովի օրը, այնքան միջազգային դաշտում որոշակի ակտիվություն գերիների, ռազմագերիների հարցով նկատվում է, երեկ էլ տեղեկացանք, որ Եվրոպական խորհդարանում է պլանավորվում այս թեմաներով քննարկում իրականանցել: Այս մասին ՄԱԿ-ի հայաստանյան գրասենյակի դիմաց ակցիայի ժամանակ լրագրողների հետ զրույցում ասաց Արցախի ՄԻՊ Գեղամ Ստեփանյանը:
«Սա ժամանակահատված է, որ աշխարհի ուշադրությունը դեպի Ադրբեջան է տանելու, և մենք պետք է օգտագործենք բոլոր հնարավորություններն այս՝ Ադրբեջանի վրա սևեռված ժամանակահատվածում, պարտադրել, որ կատարի մարդասիրական դրույթները, հակառակ դեպքում Ադրբեջանն ավելի կոգևորվի հետագա անպատժելիությունից»,- ասաց նա:
Ստեփանյանի խոսքով՝ սա այն թեման է, որի մասին լռել ուղղակի չխոսել կամ անտեսման մատնել իրավունք չկա և որ խոսքը մարդկանց ճակատագրերի մասին է, պահանջը միշտ պետք է ներկայացվի հնարավորինս ավելի մեծ ճնշում գեներացնելու համար:
Հարցին՝ ինչո՞ւ ՄԱԿ-ում Փաշինյանը չխոսեց Ադրբեջանում պահվող հայ գերիների խնդրից, Ստեփանյանն արձագանքեց․ «Թե ինչո՞ւ չխոսեց, դա պետք է հարցնել Փաշինյանին, բայց մենք շատ անգամ նշել էինք, որ դա բացառիկ հնարավորություն էր այս կարևոր հումանիտար հարցը բարձրաձայնելու համար, ևս մեկ անգամ միջազգային բարձր ատյանից միջազգային հանրության ուշադրությունը դրա վրա հրավիրելու համար»:
Նրա կարծիքով՝ Հայաստանն ավելի ակտիվ քայլեր պետք է ձեռնարկի միջազգային հարթակում, հատկապես նոյեմբերին ընդառաջ, այս հարցը հնչեցնելու համար: Նա նաև նշեց, որ անընդունելի քայլ կլինի ՀՀ մասնակցությունը COP29-ին այն պարագայում, երբ ունենք գերիներ և չճշտված ճակատագրեր:
