Գերմանիան ընդգծել է ՀԳՀԾ-ի պահպանման և Իրանի հետ բանակցելու անհրաժեշտությունը
Գերմանիայի ԱԳ նախարարն ընդգծել է Համատեղ գործողությունների համապարփակ ծրագրի պահպանման և Իրանի հետ բանակցությունները շարունակելու անհրաժեշտությունը:
Ինչպես հաղորդում է ԻՌՆԱ լրատվական գործակալությունը, Գերմանիայի ԱԳ նախարար Հեյկո Մաասը, երկուշաբթի օրը, նախքան Բրյուսելում ԵՄ-ի ԱԳ նախարարների նիստի անցկացումը, կարևորել է Իրանի հետ կնքած միջուկային համաձայնագիրը: Նա ընդգծել է Համատեղ գործողությունների համապարփակ ծրագիրը պահպանելու շուրջ իր եվրոպացի գործընկերների, հատկապես՝ Ֆրանսիայի ու Բրիտանիայի ԱԳ նախարարների հետ խորհրդակցությունը շարունակելու անհրաժեշտությունը:
Գերմանիայի ԱԳ նախարարությունը ևս հրապարակել է հաղորդագրություն, որում ընդգծել է, որ ԵՄ-ը մտադիր է պահպանել Իրանի հետ կնքած միջուկային համաձայնագիրը:
Ֆրանսիայի ԱԳ նախարար Ժան Իվ Լե Դրիանը ևս կարևորել է ՀԳՀԾ-ի պահպանումը:
ԵՄ արտաքին քաղաքականության հարցերով հանձնակատար Ֆեդերիկա Մոգերինին ընդգծել է, որ այսօր Բրյուսելում անցկացվող ԵՄ-ի արտաքին հարցերով խորհրդի նիստում կքննարկվեն ՀԳՀԾ-ի լիարժեք իրագործման ուղիները և ոչ մի առաջարկ չի ներկայացվել Իրանի նկատմամբ նոր պատժամիջոց կիրառելու կապակցությամբ:
