ՅՈՒՆԻՍԵՖ-ը քննադատեց միգրանտ երեխաներին ծնողներից առանձնացնելու ԱՄՆ-ի քաղաքականությունը
ՄԱԿ-ի Մանուկների պաշտպանության հիմնադրամ՝ ՅՈՒՆԻՍԵՖ-ի խոսնակը խիստ քննադատեց միգրանտ երեխաներին իրենց ծնողներից բաժանելու ԱՄՆ-ի կառավարության քաղաքականությունը:
Համաձայն «Ասոշիեյթեդ պրես»-ի հաղորդման, ՅՈՒՆԻՍԵՖ-ի խոսնակ Քրիստոֆ Բոլռաքը երեքշաբթի օրն ասաց. «Այս օրերին ԱՄՆ-ում ցավալի մի ողբերգության ականատես ենք, քանի որ երեխաները, որոնցից որոշները նորածիններ են, առանձնացվում են ԱՄՆ-ում ապաստան գտած իրենց ծնողներից»:
«Երեխաները չպիտի պատժվեն իրենց ծնողների ընդունած որոշումների պատճառով»,-հայտարարեց Քրիստոֆ Բոլռաքը։
ՄԱԿ-ի գլխավոր քարտուղար Անտոնիո Գութերեշն էլ երեքշաբթի օրն անդրադառնալով ԱՄՆ-ում Թրամփի կառավարության հակամիգրացիոն քաղաքականությունները միգրացիան անխուսափելի ու անհրաժեշտ երևույթ համարեց:
Թրամփի կառավարությունը որդեգրելով «զրոյական հանդուրժողականություն» քաղաքականությունը, որոշել է անխտիր դատական գործընթաց սկսել բոլոր անօրինական միգրանտների դեմ, որի շրջանակներում մինչև ծնողների կարգավիճակի հստակեցումը, երեխաները մեկուսացվում են ընտանիքներից:
