Հաֆեզը՝ գերմանացի գեղանկարչի վրձնի նկարագրմամբ
Հյուսիսը, արևմուտքն ու հարավը փլուզվելու են, գահերը կործանվելու են ու սասանելու են երկրները, ուրեմն հայացքդ ուղղիր մաքուր արևելքին, որպեսզի իր զով զեփյուռով, սիրով ու գազելներով քեզ կենդանություն պարգևի:
Խաջե Շամսեդդին Մոհամմեդ Հաֆեզ Շիրազին Իրանի ու աշխարհի 14-րդ դարի ամենամեծ գազելագիրներից ու գրողներից է, ով բազմաթիվ սիրահարներ ունի աշխարհի տարբեր կողմերում: Ասես ինքն էլ դա կանխատեսելով իր գազելներում գրել է.
Թե իմ գերեզմանի կողքով անցնես, կանգ առ
Քանզի դա աշխարհի ազատախոհների ուխտավայրը կդառնա:
18-րդ և 19-րդ դարերի գերմանացի բանաստեղծ, գրականագետ, գրող ու գեղանկարիչ Յուհան Վոլֆգանգ Ֆոն Գյոթեն Հաֆեզի սիրահարներից էր, ով դիմելով նրան գրել է. «Հաֆեզ, քեզ հետ համեմատվելը կարող է խելագարության նշան համարվել: Դու այն նավն ես, որ հպարտորեն պարզել է իր կայմերը, որպեսզի ճեղքի ծովերն ու ալիքները, իսկ ես փայտի այն կտորն եմ, ում ապտակում են օվկիանոսի ալիքները: Քո հուզիչ խոսքերում ալիքը հաջորդում է ալիքին, ու երբեմն կրակի ծով է բոցավառվում ու այդ կրակե ալիքը կլանում է ինձ: Այդուհանդերձ դեռ մի փոքր համարձակություն եմ գտել , որպեսզի ինձ դասեմ քո հետևորդների շարքը»:
---
«Խոնարհվել Հաֆեզի առջև» խորագրով ցուցահանդեսը, որտեղ ներկայացված են գերմանացի գեղանկարիչ Գյունթեր Օքերի ստեղծագործությունները մի քանի օր է ինչ կայացել է Թեհրանում ու շարունակվելու է մեկ ամիս: Գյունթեր Օքերի կտավները ներշնչված են Հաֆեզի գազելներից: Ցուցահանդեսը նախ կազմակերպվել էր Շիրազի «Հաֆեզիե»-ում ու նրա դամբարանի հարևանության մեջ, որից հետո փոխադրվել է Թեհրանի «Իմամ Ալի»-ի անվան կրոնական արվեստների թանգարանը: «Խոնարհվել Հաֆեզի առջև» ցուցահանդեսն Իրանից հետո ներկայացվելու է նաև Գերմանիայում:
«Խոնարհվել Հաֆեզի առջև» ցուցահանդեսի բացումը կատարվեց Իրանի գեղարվեստական ոլորտի պատասխանատուների, Գյունթեր Օքերի, գերմանական ցուցասրահների տերերի ու նաև իրանցի արվեստագետների ներկայությամբ: Ցուցահանդեսում ներկայացված են Հաֆեզի 30 գազելների ներշնչմամբ ստեղծված 42 կտավներ:
Օքերը գերմանացի հայտի արվեստագետներից է, ով 50 տարուց ի վեր է ինչ դասվում է արևմուտքի արվեստի առաջատարների շարքում և անդամակցում է ավանգարդիստների «Զիրո» խմբին: Հակառակ Գյոթեին ով արևելք այցելելու բախտը չունեցավ և իր «Արևելյան արևմտյան» ստեղծագործության մեջ ներշնչվեց գրավոր աղբյուրներից, Օքերն անմիջական և ուղղակի ազդեցություն է կրել:
2012 թվականին Օքերի ստեղծագործությունների մեծ ցուցահանդեսը «Խոցեր ու կապեր» խորագրի ներքո կազմակերպվեց Թեհրանի ժամանակակից արվեստների թանգարանում ու մի քանի ամիս անց ներկայացվեց նաև Սպահանի ժամանակակից արվեստների թանգարանում: Թեհրան ու Սպահան կատարած նրա ուղևորությունը պատճառ դարձավ, որ նա ավելի լավ ծանոթանա իրանական-իսլամական արվեստներին , ինչը մեծապես ազդեց նրան:
Նա վերջին երկու տարիներին դադարեցրեց իր աշխատանքային բոլոր նախագծերն ու գեղարվեստական ծրագրերը և կենտրոնացավ այս նախագծի վրա: Հաֆեզի բանաստեղծություններից ուղղակիորեն կրած ազդեցությունն այս նախագծի գլխավոր յուրահատկությունն է, ինչը այն վերածել է վերջին տասնամյակներում Իրանի ու արևմուտքի միջև մշակութային ամենամեծ երկխոսության ու համագործակցության խթանիչ գործոնի:
Գերմանացի արվեստագետը Շիրազում իր ցուցահանդեսի բացման ժամանակ ասաց. «Սա Հաֆեզի ու բանաստեղծական ազատության, ինչպես նաև մարդու հանդեպ նրա զգացմունքի խորության ու տառապանքի ընկալման մեծարումն է, ինչն իմ ստեղծագործություններում երևան է եկել գույների ընկերակցությամբ»:
Նա այս հանդիսության ժամանակ հանեց կոշիկներն ու ներկայանալով Հաֆեզի դամբարանում հարգանքի տուրք մատուցեց նրան:
---
Թռուցիկ հայացք նետելով գերմանացի արվեստագետի կտավներին կարելի է ըմբռնել, որ Օքերը մեծ սեր ունի Հաֆեզի հանդեպ, և նրա բանաստեղծություններն իր դիտանկյունից վերածել է գծերի ու գույների և իր կտավները զարդարել է Հաֆեզի գազելներով: Այս կտավների գունապնակը բարձրագույն արվեստի լույսի ու գույնի փայլն է, սակայն այդտեղ միևնույն ժամանակ կարելի է նկատել ոչ-տեղացի արվեստագետի հետքը: Օքերը տիրապետում է իրանական ճարտարապետության ու գեղանկարչության մեջ կենսական նշանակություն ունեցող երկրաչափական ձևերին ու գույներին և օգտվելով սիմետրիկ գծերից դիտողի մոտ մզկիթի պես կրոնական շինությունների պատկերացում է ստեղծում:
Հաֆեզն իր բանաստեղծություններում փորձ է կատարում ձերբազատվել կյանքի նյութեղեն ծավալներից ու նկարագրում է տիեզերքի ճշմարտությունները: Իրանցի արվեստագետի ու արվեստի համար տիեզերքը լեցուն է աստվածային նշաններով, որոնց միայն կարելի է նկարագրել սիմվոլների լեզվով: Օքերը մասամբ ըմբռնել է հոգևոր ու աստվածային այս սիմվոլները և իր մի քանի կտավներում դրանք ներկայացրել է կենդանի ու բաց գույնի կլոր շրջաններով:
Կլոր շրջանը, որպես ճշմարտության հանգելու և միստիցիզմի սիմվոլ օգտագործում է, որպես իրանական արվեստների գլխավոր տարրերից մեկը և խորհրդանշում է միացման համար դեպի կենտրոն ուղղված ընթացքը, ինչը հանդիսատեսի ուշադրությունը հրավիրում է դեպի կենտրոնը: Օքերն իր կտավներում բազմիցս օգտվել է այդ սիմվոլներից:
Ուժեղ գույներով ծաղիկներն ու տերևները խորհրդանշում են կենսունակությունն ու լուսարարությունը, ինչը Հաֆեզի պատկերած դրախտային այգու բույրից նկարչի ընկալման արդյունք է: Գույնը տարր է, որ ամեն ինչից առավել ուշադրության արժանանում կտավներում: Այս արվեստագետի շատ ստեղծագործություններում օգտագործված գույները թեև աշխարհում ունեն իրենց որոշակի իմաստը, սակայն Օքերը չի անտեսել իրանական արվեստում այդ գույների ավանդական իմաստը և գույների կիրառման ժամանակ ուշադրություն է ցուցաբերել դրանց հանդեպ:
Գեղանկարչության մի փորձագետ համոզված է, որ կտավները դիտողի համար առավելապես համարվում են ստեղծագործողի ներքին հայտնությունն ու Հաֆեզի բանաստեղծություններից նրա անձնական ընկալման արդյունքը: Հետևաբար եթե Հաֆեզի գազելները կտավի վրա պատկերի իրանցի մի արվեստագետ դրա արդյունքը կլինի առավել տեղական, ինչը նաև առավել գրավիչ ու ընկալելի կլինի իրանցի դիտողի համար:
Այս կտավները իրանական գազելի և մոդեռն գեղանկարչության միաձուլում են և այդ հիման վրա թվում է, որ ոչ-իրանցի դիտողն ավելի լավ կապ կարող է ստեղծել այս ստեղծագործությունների հետ: Ի դեպ, թվում է, որ այն բոլորն ինչ գոյություն ունեն Հաֆեզի հմայիչ բանաստեղծություններում ու նաև նրա գազելների կախարդանքը հնարավոր չէ գտնել այս կտավներում ու դրանք չեն կարող համեմատվել Հաֆեզի դիրքի հետ:
Հաֆեզը բոլոր ժամանակների ու դարերի բանաստեղծն է, ով որևէ աշխարհագրական սահմանում չի տեղավորվում ու պատկանում է աշխարհի բոլոր ժողովուրդներին: Նրա բանաստեղծությունները թարգմանվել են աշխարհի գրեթե բոլոր լեզուներով և նրա համբավը աշխարհատարած է: Հաֆեզի պոեզիան ու նաև Հաֆեզի ու Գյոթեի գաղափարների ընդհանուր եզրերը վերացրել են Իրան ու Գերմանիայի միջև եղած սահմաններն ու իրար են մոտեցրել այդ երկու երկրներին: Աշխարհի բոլոր ժողովուրդները հմայված են Գյոթեով ու Գյոթեն հմայված է եղել Հաֆեզով: Հաֆեզի հանդեպ սերը Գյոթեն արտահայտում է գրական տողերում, իսկ այս հուզումն այսօր կարելի է նկատել Գյունթեր Օքերի կտավներում:
---
«Խոնարհվել Հաֆեզի առջև» ցուցահանդեսի հետ միաժամանակ նաև տեղի ունեցավ Գյունթեր Օքերի գրքի շնորհանդեսը: Այս գիրքը պարունակում է այն ստեղծագործությունները, որոնք անցած տարվա սեպտեմբերին Թեհրանի ժամանակակից արվեստների թանգարանում հանձնվեցին հանդիսատեսի դատողությանը: Գրքի ներքին շապիկի վրա աչքի է ընկնում Օքերի հետևյալ արտահայտությունը. «Թեհրանում ջերմ ու էներգիա հաղորդող բարի հայացքներից տպավորված խոսում եմ ձեզ հետ: Այս տպավորությունը կարելի է նկատել իմ արցունքներում, որոնք հուշերը միաձուլում են կարոտին և վերհիշում եմ այնպիսի հանդիպումներ, որոնք հագեցած են եղել բարի հպարտությամբ»:
Այս թանկարժեք գիրքը պարսկերեն, անգլերեն ու գերմաներեն լեզուներով հրատարակվել է Թեհրանի ժամանակակից արվեստների թանգարանի կողմից: Օքերը գրքում Հաֆեզի մասին գրել է. «Ես մեծարում եմ բանաստեղծ Հաֆեզին՝ նրա պոետական ազատության, մարդկային զգացմունքների հետ խոր մտերմության և արարչագործության մեջ նկատած հույզի ու տառապանքի համար, որոնց արտացոլել է իր ստեղծագործություններում: Հաֆեզի բանաստեղծությունները դեգերում են այն ինչի միջև որ կարելի է արտահայտել ու նրա՝ ինչը հնարավոր չէ արտահայտել: Այս բանաստեղծություններն ինձ մոտ մղում են առաջացրել, որպեսզի նրան ընկերակցեմ իմ գույների միջոցով՝ դրախտային այգու բույրով հագեցած երգով հույզերի այն դաշտում որի վրայով սավառնում է արևելյան զեփյուռը: Սրանք բոլորն ինձ մղեցին, որպեսզի այս բանաստեղծի ստեղծագործությունները պատկերազարդեմ ու թագ դնեմ դրանց գլխին»:
Մեր զրույցն ավարտում ենք Հաֆեզի անհատականության, մտքերի ու գրականության մասին Գյոթեի խոսքերով. «Ով Հաֆեզ, քո խոսքը նման է մեծ հավերժության, քանզի չունի սկիզբ ու վախճան: Քո խոսքը նման է երկնքի գմբեթին, միայն հիմնված է իր վրա ու գազելի սկիզբ ու վերջը չի կարելի տարբերել, քանզի բոլորն էլ կատարելիության ու գեղեցկության գագաթնակետին են: Եթե մի օր աշխարհը հասնի ավարտին, ով երկնային Հաֆեզ, փափագում եմ միայն լինել միայն քեզ հետ ու քո կողքին: Քանզի դա իմ կյանքի պարծանքն ու ինձ շունչ պարգևող աղբյուր է»:
---