Հանուն գթած և ողորմած Աստծո:Ողջույն հղելով բարության մարգարե Մոհամմադի անմար հիշատակին եւ բարեւելով Ձեզ հարգելի ռադիոլսող բարեկամներ ներկայացնում ենք «Ելք դեպի լույս» հաղորդումը, Ղուրանի մատչելի մեկնաբանությամբ:

Ղեսաս սուրահի 5-6-րդ այաներ

وَنُرِیدُ أَنْ نَمُنَّ عَلَى الَّذِینَ اسْتُضْعِفُوا فِی الْأَرْضِ وَنَجْعَلَهُمْ أَئِمَّةً وَنَجْعَلَهُمُ الْوَارِثِینَ

وَنُمَکِّنَ لَهُمْ فِی الْأَرْضِ وَنُرِیَ فِرْعَوْنَ وَهَامَانَ وَجُنُودَهُمَا مِنْهُمْ مَا کَانُوا یَحْذَرُونَ

 Մենք ցանկացանք հարստությամբ ողողել նրանց, որոնք հարստահարված էին՝ դարձնելով (մարդկանց) առաջնորդներ ու (երկրի) ժառանգորդ:

Մենք ցանկացանք աշխարհի վրա հաստատել նրանց տիրապետությունը և փարավոնին ու Համանին, ինչպես նաև բանակին ցույց տալ այն ամենը, ինչից սոսկում էին:

Այս այաները խոսում են այն մասին, որ փարավոնը  կարծում էր, թե իշխանությունը մշտապես լինելու է իր ձեռքում ու նա անելու  է այն, ինչ ցանկանա: Նա թերևս չգիտեր, որ Աստված կամենում է բռնատերերին հենց այս աշխարհում նվաստացնել ու չարքաշներին իշխանություն  տալ: Փարավոնն ու նրա նախարար Համանը մշտապես վախ ունեին, որ Իսրայելի ժողովուրդը կարող է ապստամբել ու տապալել իրենց իշխանությունը: Ուստի Իսրայելի ժողովրդին ենթարկում էին խոշտանգումների, իսկ երիտասարդներին՝ սպանում: Սակայն այն, ինչ փարավոնի աջակցների սարսափի պատճառ էր դառնում, Աստծու կամոք իրենց հասավ: Իսրայելի ժողովուրդը, Մովսեսի ղեկավարությամբ, հաղթեց նրանց ու տիրրացավ նրանց հարստություններին ու պալատներին: Իհարկե Աստծու կամքը հենց այնպես չի կատարվում: Եթե մի ժողովուրդ ցանկանա գնալ փրկության ճանապարհով, Աստված նրան հաղթանակ կպարգևի: Այսպես է եղել պատմության ողջ ընթացքում: Եվ քանի դեռ ժողովուրդները չեն ցանկանում փոփոխել իրենց կյանքն այն չի փոխվելու: Իսլամական որոշ աղբյուրների համաձայն, երբ գա աշխարհի վերջը, մարգարեի ժառանգորդներից իմամ Մահդին գալու է և բռնատերերին հաղթելով, չարքաշներին իշխանություն է տալու, որպեսզի արևելքում ու արևմուտքում խաղաղություն հաստատվի։

Այս այաներից սովորում ենք.

1. Աստծու կամքն է, որ բռնատերերը վերանան ու չարքաշներն իշխանության գան:

2. Բռնատեր իշխանությունները գործունյա ուժերին ոչնչացնում են, որպեսզի կարողանան իշխել ժողովուրդների վրա:

3. Աշխարհի ապագան չարքաշներինն  է և այս պատգամն Աստված նրանց տվել է, որպեսզի ապագայի նկատմամբ հույսով պայքարեն:

4. Բռնատեր ուժերը ոչ միայն հանդերձյալ կյանքում, այլ հենց այս աշխարհում կարժանանան աստվածային պատժին և հավատացյալների ձեռքով կկորցնեն իրենց ուժը:

Ղեսաս սուրահի 7 և 8-րդ այաներ

وَأَوْحَیْنَا إِلَىٰ أُمِّ مُوسَىٰ أَنْ أَرْضِعِیهِ ۖ فَإِذَا خِفْتِ عَلَیْهِ فَأَلْقِیهِ فِی الْیَمِّ وَلَا تَخَافِی وَلَا تَحْزَنِی ۖ إِنَّا رَادُّوهُ إِلَیْکِ وَجَاعِلُوهُ مِنَ الْمُرْسَلِینَ

فَالْتَقَطَهُ آلُ فِرْعَوْنَ لِیَکُونَ لَهُمْ عَدُوًّا وَحَزَنًا ۗ إِنَّ فِرْعَوْنَ وَهَامَانَ وَجُنُودَهُمَا کَانُوا خَاطِئِینَ

Մենք ներշնչեցինք Մովսեսի մորը. «Նրան կաթ տուր ու եթե վախենում ես, որ նա չապրի, Նեղոսը նետիր: Ոչ մի բանից մի վախեցիր, որովհետև նրան մի օր քեզ կվերադարձնենք ու մարգարե կհռչակենք»:

 Փարավոնի ընտանիքը (Նեղոս գետից) գտավ նրան, որ մի օր պիտի դառնար իր թշնամին և դառը վիշտ պատճառեր, որովհետև փարավոնը, Համանն ու նրանց բանակն ամբարիշտ էին:

Այս այաները պատմում են Մովսեսի ծնունդի ու դրանից հետո տեղի ունեցած իրադարձությունների մասին: Դրանք ցույց են տալիս, որ Աստծու կամքն իրականություն է  դառնում և չարքաշները հաղթում են բռնատերերին: Այդ մասին խոսվել է նաև այլ այաներում։

Մոգերը փարավոնին ասել էին, որ իր երկրում ծնվելու է մի տղա, որը ոչնչացնելու է իր իշխանությունը: Փարավոնը հրամայեց, որ իսրայելցիների բոլոր նորածին տղաներին սպանեն: Այդ ժամանակ, ծնվեց նաև Մովսեսը: Աստված Մովսեսի մորն ասաց, որ նրան կաթ տա, այնուհետև դնի տուփի մեջ ու գցի Եփրատ գետը և Աստված նրան պահապան կդառնա:  Մայրն այդպես արեց, չնայած մտահոգ էր Մովսեսի ճակատագրով: Նույն ժամանակ, Փարավոնն ու նրա կինը, նստած էին գետի ափին ու տեսան  արկղը,  որը լողում էր ջրի մեջ: Փարավոնը հրամայեց արկղը դուրս բերել ջրից: Եվ երբ այն բացեցին, տեսան նորածնին, որի հետ չգիտեին ինչ անել: Մի կողմից փարավոնը հրամայել էր սպանել իսրայելցիների տղա երեխաներին,  ու պարզ էր որ այս երեխան էլ իսրայելցի է: Մյուս կողմից, փարավոնը տղա չուներ և նրա կինը Ասիեն, ցանկացավ որդեգրել երեխային: Սակայն դրանից ավելի վեր, Աստծու կամքն էր, որը Մովսեսի մորը հրամայեց երեխային ջուրը նետել: Իսկ մյուս կողմից, Աստված փարավոնի կնոջ սրտում սեր դրեց այդ երեխայի նկատմամբ: Այսպիսով, Մովսեսը մեծանում է իր թշնամու տանը,  ապահով միջավայրում, որպեսզի հետագայում վերջ տա փարավոնի բռնատեր իշխանությանը:

Այս այաներից սովորում ենք.

1. Փակուղիների ժամանակ, Աստված հավատացյալների ամենալավ առաջնորդն է և ցույց է տալիս ճիշտ ճանապարհը:

2. Աստծուն ապավինելու հետ միասին, պետք է օգտվենք մեր բոլոր հնարավորություններից՝ մեր պարտավորությունները ճիշտ կատարելու համար:

3. Չնայած Աստծու պատվիրանների մեծ մասը չգիտենք, սակայն դա չպետք է պատճառ դառնա, որ թերանանք Աստծու հրամանները կատարելիս, քանի որ այն հրամանները, որ Աստված է տվել, գաղտնիքներ են և Նրա ոչ մի վճիռն անիմաստ չի կարող լինել: