جنګ د افغانستان په اقتصاد منفي اغیزونه کړي دي
زمونږ خبریال وايي په افغانستان کښې د جنګ او د تاوتریخوالي زیاتیدا د زرګونو ملکي وګړو او پوځیانو په وژل کیدا سربیره د هیواد په اقتصاد هم ناوړه اغیزونه کړي دي .
د افغانستان د کورنیو چارو د وزارت د نوي راپور پراساس جنګ په تیرې مي میاشتې کښې د دوه سوه اتویشتو (۲۲۸) کسانو په وژل کیدا او د پینځه سوه اوویشت (۵۲۷)نورو په ژوبلیدا سربیره د زرګونو خلکو د کډوالیدا او د زرګونو نور کسانو د بې روزګاره کیدا سبب شوی دی .
د افغانستان د تجارت او د پانګونې د کوټې اجرايي مشر شفیق الله عطايي وايي جنګ او نا امنۍ په هیواد کښې په پانګونې منفي اغیز کړی او ډیر پانګه اچونکي له افغانستان څخه د وتلو په حال کښې دي .
د افغانستان د تجارت کوټې ویلي دي په تیر میلادي کال کښې څوارلس سوه (۱۴۰۰) سوداګرانو د ګواښ او د ناامنۍ په دلیل خپله کابو دوه (۲) میلیارډه ډالره پانګه نورو هیوادونو په تیره بیا ترکیې ته انتقال کړي ده .
د افغانستان یو (۱)سوداګر حاجي بیګ نوروز هم د ژوند او د مالي امنیت نه درلودل له هیواد څخه د پانګې د وتلو مهم دلیل وباله او ویې ویل سړي تښتونکي د صرافانو او د شتمنو کسانو د کورنۍ د غړیو په تښتولو سره د هغوې د خلاصون لپاره پیسې غواړي .
