د هرات –کابل په یوه الوتنه کې د چاودنې مخه ونیول شوه
د ملي امنیت ریاست د یوې اعلامیې په خپرولو سره ویلي چې یوه بریدګر د موسیقۍ په اله کې چاودېدونکي توکي ځای پر ځای کړي و او غوښتل یې چې د الوتکې د پرواز پر وخت چاودنه ورکړي.
د افغانستان د ملي امنیت عمومي ریاست وايي چې د دې ریاست منسوبینو د هرات –کابل په یوه الوتنه کې د ترهګریز برید مخنیوی کړی او بریدګر یې نیولی دی.
د ملي امنیت ریاست د یوې اعلامیې په خپرولو سره ویلي چې یوه بریدګر د موسیقۍ په اله کې چاودېدونکي توکي ځای پر ځای کړي و او غوښتل یې چې د الوتکې د پرواز پر وخت چاودنه ورکړي.
اعلامیه زیاتوي، «د هنرمند په جامه کې یو ترهګر سید ادریس د رجب علي زوی د موسیقۍ په اله کې یې له RDX چاودېدونکو توکو جوړ شوی لاسي بم او کیمیاوي مواد په ماهرانه ډول ځای پر ځای کړي و او پلان یې درلود چې د پرواز په وخت کې چاودنه ورکړي.»
د اعلامیې له مخې، د ملي امنیت منسوبینو او د خواجه عبدا... انصاري هوايي ډګر پولیسو په وخت اقدام وکړ او بې له دې چې د مسافرو منځ کې کومه وېره او ډار خپور شي د سید ادریس له لوري د رباب په منځ کې ځای پر ځای شوي چاودېدونکي توکي یې کشف او شنډ کړل.
د ملي امنیت ریاست وايي، وسله والې ډلې په پرله پسې ډول ملکي خلکو او ټولګټو تاسیساتو ته د زیان اړولو په هڅه کې دي، خو زیاتوي چې امنیتي او دفاعي ځواکونه په قاطعیت او وړتیا سره د هغوی پلانونه شنډوي.
د ملي امنیت ریاست د نیول شوي کس او د الوتنې د وخت په هکله چې ټاکل شوې وه کابل ته وشي، نور جزئیات نه دي ورکړي.
