متقي په دوحه کښې د اروپایي هېوادونو له سفیرانو سره کتلي
قطر هېواد ته د طالبانو د بهرنیو چارو د سرپرست وزیر امیرخان متقي په مشرۍ تللي پلاوي بیګا ناوخته په دوحه کښې د یوشمیر اروپایي هېوادونو له سفیرانو سره کتلي او پر ځینو مهمو مسایلو یې خبرې کړې دي.
کلید خبري ګروپ لیکلي د افغانستان د بهرنیو چارو وزارت لخوا په خپره شوې اعلاميه کې راغلي، چې په دې ناسته کې د ۱۶ اروپايي هېوادونو سفيرانو سره په بشري او اقتصادي وضعيت، بشري حقونو، بشري مرستو، سياسي اړيکو، تعليمي او اجتماعی چارو، د ښوونکو پر معاشونو او مثبتو بدلونونو خبرې شوې دي.
د خبرپاڼې له مخې، د غونډې ګډونوالو ژمنه کړې چې د افغان ولس هر اړخيزه ښه والي لپاره به ممکنه هڅې کوي.
له دې وړاندې د بهرنیو چارو سرپرست وزیر امیر خان متقي په مشرۍ تللي پلاوي د اروپایي او خلیجي هېوادونو له استازو سره هم کتلي وو.
د بهرنیو چارو سرپرست وزیر امیرخان متقي په مشرۍ لوړ پوړي پلاوی دوه ورځې وړاندې د فارس خلیج د غاړې غرب هېوادونو، اروپايي ټولنې او له هغو دیپلوماتیکو استازو سره چې له قطره فعالیت کوي د خبرو په هدف دوحې ته تللی دی.
