د افغانستان امنیت او ثبات د سیمې په ګټه دی
فارس خبري اژانس وايي په افغانستان کښې د ایران سفیر بهادر امینیان وویل په افغانستان کښې امنیت او ثبات د سیمې د هیوادونو په ګټه دی.
هغه نن په کابل کښې د طالبانو د موقته حکومت له خارجه وزیر امیر خان متقي سره په کتنه کښې د دواړو هیوادونو ترمینځ د سرحدي مسائیلو په حل کولو ټینګار وکړ.
امیر خان متقي هم له ایران سره د دوه اړخیزه اړیکو په پراختیا باندې د خوښې په څرګندولو سره وویل افغانستان هڅه کوي چې د سیمې د ټرانزیت په مرکز بدل شي او په دې لړ کښې د ایران او د تاجیکستان ترمینځ د تجارتي شیانو په انتقالولو کښې ګډون لرلی دی.
د طالبانو د خارجه وزارت د ویاند مرستیال حفیظ ضیا احمد هم په ټویټر پیغام کښې په افغانستان کښې د ایران له سفیر سره د طالبانو د خارجه وزیر امیر خان متقي کتنې ته په اشارې سره په ایران کښې د افغانستان د کډوالو ، د بندیانو ، له نشه ییزو موادو سره د مبارزې موضوع ، سرحدي موضوګانې او دوه اړخیزه تجارتي اړیکې د دغه کتنې په موضوعګانو کښې وبللې.
