په افغانستان کې د ګرځندوی لپاره ښه زمینه برابره شوې
د پنجشېر ولايت د اطلاعاتو او کلتور ریاست چارواکي دغه ولایت ته د لسو پولنډي سیلانیانو د ورتګ خبر ورکوي.
د باختر خبري آژانس د خبر له مخې، د دغه ولایت د اطلاعاتو او کلتور مشر مولانا نصرالله ملک زاده له دغو لسو پولنډي سيلانيانو سره وکتل چې دغه ولايت ته د طبيعي او تاريخي سيمو د ليدنې په موخه تللي دي.
مولانا نصرالله ملک زاده له دغو سيلانيانو سره په خبرو کې وويل چې دغه ډول سفرونه کولاى شي د کلتورونو په نږدې کولو او د هېوادونو ترمنځ د اړيکو په ټينګښت کې ښه رول ولوبوي.
ورته مهال پولنډي سیلانیانو په دې کتنه کې وویل، چې اوسمهال په افغانستان کې د ګرځندوی لپاره ښه زمینه برابره شوې او دوی به په دغه ډله ایز سفر کې د پنجشېر له ټولو طبیعي او تاریخي ځایونو څخه لیدنه وکړي.
هغوی زیاته کړه، چې د طالبانو په راتګ سره په افغانستان کې امنیت په بشپړه توګه تامین شوی او همدا د دې لامل شوی چې د نړۍ له هر ګوټ څخه سیلانیان افغانستان ته راشي او له تاریخي او طبیعي ځایونو څخه لیدنه وکړي.
