طالب مشرانو د کورني سیاست او پالیسو په هکله غونډه وکړه

زمونږ خبریال راپور راکړی د افغانستان د طالبانو د ریاست الوزراء د سیاسي مرستیال محترم مولوي عبدالکبیر په مشرۍ د سیاسي کمېسیون ناسته په سپيدار ماڼۍ کې ترسره وشوه.

په دې ناسته کې د هېواد او سیمې پر وروستي وضعیت او تحولاتو خبرې وشوې او د سرپرست حکومت د کورني سیاست او پالیسو په هکله مفصل بحث وشو.

په یاده ناسته کې د کورني سیاست د مسودې او یوشمېر نورو مهمو موضوعاتو په اړه لازم تصامیم ونیول شول.

د سیاسي کمېسیون په دې ناسته کې دغه راز له افغان شخصیتونو سره د اړیکو او افغانستان ته د هغوی د راستنولو کمېسیون چارې هم و ارزول شوې او د چارو د ښه والي لپاره اړوندو مسؤولینو ته لازمې سپارښتنې هم وشوې.