اوس مهال د افغانستان له ۱۳ ولایتونو څخه بهر ته صادرات کېږي

د افغانستان د سرپرست حکومت اقتصادي مرستیال، د صادراتي محصولاتو د پروسس د شپږ زونونو جوړولو ته په اشارې ویلي چې اوس مهال له ۱۳ ولایتونو بهر ته صادرات کېږي.

نوموړي ویلي، چې د سوداګرو لپاره د لا زیاتو اسانتیاوو د برابرولو او د سوداګریزو تعرفو د ښو کولو په موخه، له بېلابېلو هېوادونو سره خبرې کوي.

د هغه په خبره، سرپرست حکومت د صادراتو د کیفیت ښه کېدو په موخه د هېواد د بندرونو معیاري کولو په اړه له یو شمېر بهرنیو شرکتونو سره خبرې کوي.

ورته مهال د صنعت او سوداګرۍ سرپرست وزیر نورالدین عزیزي د افغانستان د صادراتو د زیاتوالي او توازن په موخه، د پنځه کلن پلان د عملي کېدو خبر ورکړی دی.