افغانستان په ایران کښې هم د بریښنايي پيژندپاڼو ویش پيلوي
د طالبانو د احصائیو او اطلاعاتو د ادارې ویاند وویل چې په ایران، پاکستان او ترکیې کښې د الیکټرانک تذکرو د ویش د مرکزونو د پرانستلو لپاره یې کوششونه جاري دي.
د فارس خبري آژانس د رپورټ له مخې، د طالبانو د حکومت د احصائیو او اطلاعاتو د ادارې ویاند «محمد حلیم رفیع» وویل چې دغه اداره د بریښنايي پیژندپاڼو د ویش په لړ کښې د کډوالو د ستونزو د هواري پروګرامونه اجرا کوي.
هغه زیاته کړه: ډیر زر به په ایران، پاکستان او ترکیې کښې د افغان کډوالو لپاره د بریښنايي تذکرو د جوړولو مرکزونه پرانستل شي.
رفیع څرګنده کړه چې په دې وروستیو کښې په متحده عرب اماراتو کښې د بریښنايي پیژندپاڼو د صادرولو مرکز پرانیستل شوی او په دغه هیواد کښې استوګنو افغان کډوالو ته د پيژندپاڼو د صادریدو بهیر روان دی.
هغه «آوا» خبري آژانس ته ویلي چې دمګړۍ په افغانستان کښې د بریښنايي تذکرو د ویش ۷۸ فعال مرکزونه موجود دي او هره ورځ کابو ۱۱ زره پیژندپاڼې ویشل کیږي.
په ایران کښې ډیر افغان کډوال وايي چې د الیکټرانک پيژندپاڼو د نه لرلو په وجه د پاسپورټ د نه صادریدو په شمول له ډیرو ستونزو سره مخامخ دي.
