د ایران او د طالبانو چارواکو خبرې وکړې
زمونږ خبریال راپور راکړی د افغانستان د کورنیو چارو وزارت سرپرست د دغه وزارت له مرستیال عبدالحق همکار سره د ایراني پلاوي د لیدنې خبر ورکړی.
د دغه وزارت ویاند تیره ورځ ویلي وو، د ایران د اسلامي جمهوریت له نشه ایزو موادو سره د مبارزې د معینیت د مرستیال محمد زارعي په مشرۍ یو شپږ کسیز پلاوی کابل ته راغلی او له هغوی سره د سرپرست حکومت د چارواکو لیدنې جریان لري.
ایراني رسنیو هم په خپلو راپورونو کې ویلي، تمه ده چې په دغه سفر کې به د نشه یي توکو د تولید په ګډون په افغانستان کې د تولید شویو نشه یي توکو پر وړاندې د ګډې مبارزې د پیاوړتیا، ایران ته د دغو نشه یي توکو د قاچاق د مخنیوي، کوکنارو کښت د لمنځه وړلو او د بدیل کښت پر لارو چارو خبرې وشي.
د افغانستان د کورنیو چارو وزارت د سرپرست حکومت د اعلان له مخې، د دغه وزارت مرستیال عبدالحق همکار، له ایراني پلاوي سره په کتنه کې نشه يي مواد یوه سیمه ییزه ستونزه بللې.
هغه له نشهيي توکو سره د مبارزې په برخه کې په نړیوالې همکارۍ ټینګار کړی.
هغه دغه راز د نشه يي توکو د قاچاق د مخنيوي لپاره د اطلاعاتو د تبادلې په برخه کې د ايران او افغانستان د ګډو همکاريو غوښتنه هم کړې ده.
