د څلورو اروپايي هېوادونو د اعلاميې په اړه د کابل غبرګون

د سرپرست حکومت مرستیال ویاند، په افغانستان کې د ښځو د وضعیت او له هغوی سره د تبعیض په اړه د څلورو اروپايي هېوادونو د څرګندونو په تړاو  ویلي چې، په دې برخه کې پر سرپرست حکومت تور لګول، ناسم کار دی.

د سرپرست حکومت مرستیال ویاند ویلي چې، د ځینو هېوادونو له خوا پر دوی د بشري حقونو د سرغړونو او جنسیتي تبعیض تور لګول، سم نه دی.

د سرپرست حکومت مرستیال ویاند حمدالله فطرت په ایکس ټولنیزه پاڼه کې په یوه پوسټ کې لیکلي چې په افغانستان کې بشري حقونه خوندي دي او له هېچا سره تبعیض نه کېږي.

هغه زیاته کړې چې، «له بده مرغه هڅې روانې دي چې د یو څو ښځو د ناسمو معلوماتو پر بنسټ، د افغانستان پر ضد تبلیغات وکړي او وضعیت ناسم وښيي،»