د معدنونو په استخراج سره په افغانستان کې بې وزلي کموو
زمونږ خبریال راپور راکړی د طالبانو مشر هیبت الله اخوندزاده د کوچني اختر په مناسبت په یوه پیغام کې ویلي چې د هېواد د کانونو په استخراج او سوداګرو ته د ځمکې په وېشلو سره بې وزلي کموي.
د طالبانو ارګ نن د کوچني اختر په مناسبت د هیبت الله پیغام خپور کړ چې د ډلې مشر پکې له اسلامي هیوادونو سره د تعامل غوښتنه وکړه.
هیبت الله په دغه پیغام کې زیاته کړې ده:«موږ غواړو چې له نورو هېوادونو سره ګټورې اړیکې ولرو.»
د طالبانو مشر څرګنده کړې چې نور هېوادونه باید د دې ډلې ارزښتونو ته درناوی وکړي او د افغانستان په کورنیو چارو کې لاسوهنه ونه کړي.
په دغه پیغام کې هبت الله یوازې د افغانستان نارینه وو ته د اختر مبارکي ورکړې او د هېوادوالرو ترمنځ یې د یووالي غوښتنه کړې ده.
د طالبانو مشر په داسې حال کې له نورو هېوادونو سره د اړیکو غوښتنه کړې چې تر اوسه هېڅ هېواد دا ډله په رسمیت نه ده پېژندلې.
