په کابل کې د افغانستان او ایران اقتصادي غونډه ترسره شوه
پارستودی - د افغانستان د سرپرست حکومت اقتصادي مرستیالۍ د دواړو هېوادونو د استازو د یوې تخنیکي غونډې د ترسره کېدو خبر ورکړ، چې د تهران - کابل اقتصادي تړون د بشپړ تطبیق په موخه وه.
د افغانستان د سرپرست حکومت اقتصادي مرستیالۍ دفتر په یوه اعلامیه کې ویلي، چې د تهران - کابل اقتصادي تړون د بشپړ تطبیق په موخه د دواړو هېوادونو د ګډې تخنیکي کمېټې د تعقیب غونډه په مرمر قصر کې ترسره شوه.
په اعلامیه کې راغلي، چې په دې غونډه کې د دوهاړخیزې سوداګرۍ زیاتوالی، د ترانزیټ په برخه کې د موجوده ستونزو حل، د اړینو اسانتیاوو برابرول، د کرنې په برخه کې د پرمختګ لپاره ګډې همکارۍ، د ترانسپورټ په برخه کې د اخیستل شویو پرېکړو تطبیق، په کانونو کې پانګونه او د ګمرک په برخه کې د نورو اسانتیاوو برابرولو په اړه بحث او ارزونه وشوه.
همدارنګه په دې غونډه کې د دې کمېټې د راتلونکو غونډو پر دوام او د تهران - کابل اقتصادي تړون پر بشپړ تطبیق ټینګار وشو.
