په کاپیسا کې دوه تنه د کانګو تبې له امله مړه شول

د افغانستان د کاپیسا ولایت روغتیايي چارواکو ویلي چې، تېره اونۍ دوه تنه په دې ولایت کې د ویروسي او وینه بهېدونکې ناروغۍ (کانګو تبې) له امله مړه شوي دي.

په کاپیسا ولایت کې د طالبانو د عامې روغتیا مشر نیازمحمد مخلص ویلي چې، په یوه اونۍ کې ۴۱ شکمن او ۲۱ مثبتې پېښې ثبت شوې دي.

په یاد ولایت کې علماوو او مخورو ته د یوه ورځني سمینار په ترڅ کې سپارښتنه شوې، چې خلکو ته له دغه ناروغۍ څخه د مخنیوي په موخه عامه پوهاوی ورکړي.

د افغانستان د عامې روغتیا وزارت د شمېرو له مخې، د روان میلادي کال له پیل څخه تر اوسه په ټول هېواد کې ۱۶ کسان د دې ناروغۍ له امله مړه شوي او ۲۵۰ شکمنې پېښې ثبت شوې دي.