ملګري ملتونه: زلزلهځپلي له ناوړه معیشتي وضعیت سره مخامخ دي
د کډوالو په چارو کې د ملګرو ملتونو عالي کمېشنرۍ (UNHCR) اعلان کړی چې د افغانستان په ختیځ کې له وروستیو مرګونو زلزلو وروسته ګڼې کورنۍ د ځاني زیان ترڅنګ له ډېرو مالي زیانونو سره مخ شوې دي.
نوموړي بنسټ په اېکس کې لیکلي چې اوسمهال زلزلهځپلي له ناوړه معیشتي وضعیت سره لاس او ګریوان دي.
د کډوالو په چارو کې د ملګرو ملتونو عالي کمېشنرۍ ویلي چې د زلزلهځپلو کورنیو کورونه ویجاړ شوي او اوس د سرپناه او خوراکي توکو له کمښت سره مخ دي.
نوموړي بنسټ ټينګار کړی چې هڅه کوي د بېړنیو مرستو او بیارغونې پروګرامونو له لارې د کورنیو لاسنیوی وکړي، څو بېرته خپل ژوند جوړ کړي.
دا په داسې حال کې ده چې د ملګرو ملتونو له ماشومانو د ملاتړ صندوق (یونیسف) اعلان کړی چې د افغانستان په ختیځ د زلزلهځپلو سیمو د لاسنیوي په موخه غواړي شپږ میاشتنی پروګرام پلی کړي چې ۲۱.۶ میلیونه ډالر لګښت لري.
