طالبان: د پاکستان پر وړاندې له نويو تحرکاتو ډډه کوو
د طالبانو ویاند ذبیح الله مجاهد ویلي چې په دوحه کې د دوی د مرکچي پلاوي د درناوي ساتلو لپاره له پاکستاني ځواکونو سره له نويو نښتو څخه ډډه کوي.
مجاهد پر خپله اېکس پاڼه لیکلي چې د دوی د دفاع وزیر یعقوب مجاهد په مشرۍ د طالبانو پلاوی له پاکستاني پلاوي سره د خبرو لپاره دوحې ته تللی دی.
هغه زیاته کړې چې پاکستان تېره شپه یو ځل بیا پر پکتیکا ولایت برید کړی او د ملکي وګړو د وژل کېدو لامل شوی دی.
د طالبانو ویاند دا نه ده څرګنده کړې چې د تېرې شپې په برید کې څومره ملکي وګړي وژل شوي یا ټپیان شوي دي.
طالبانو د پاکستان بریدونه تېری او د افغانستان د حریم ښکاره نقض بللی او دا اقدامات یې د جګړې د اوږدولو هڅه یاده کړې ده.
د طالبانو په وینا، دوی د خبرو اترو له لارې پر سوله ییز حل باور لري.
د طالبانو او پاکستان ترمنځ نښتې له تېرو دوو اونیو راهیسې روانې دي او په دې موده کې د ملکيانو په ګډو، لسګونه کسان وژل شوي او ټپیان شوي دي.
