د افغانستان د روغتیا وزیر نور جلال جلالي هندوستان ته رسیدلی دی
زمونږ خبریال راپور راکړی د افغانستان د روغتیا وزیر «نور جلال جلالي» پرون په یوه رسمي سفر د هندوستان پلازمینې نوي ډیلي ته رسیدلی دی.
دغه سفر په تیرو دریو میاشتو کښې هندوستان ته د افغانستان د یوه حکومتي چارواکي دریم سفر ګڼل کیږي او له دې مخکې خارجه وزیر امیر خان متقي او د صنعت وزیر نور الدین عزیزي هم نوي ډیلي ته سفرونه کړي وو.
د افغانستان د روغتیا وزارت وویل هندوستان ته د افغانستان د روغتیا د وزیر د نور جلال جلالي د دغه سفر هدف د روغتیا په برخه کښې د دوه اړخیزه ملګرتیا پیاوړي کول ، د تجربې د تبادلې زیاتول او په ګډو هڅو کښې غږملتیا کول دي.
د افغانستان د روغتیا وزارت وویل جلالي به د هندوستان له چارواکو په تیره بیا د روغتیا د چارو له مسوولانو سره جلا جلا کتنې وکړي او په څو پلان شویو پروګرامونو کښې به هم ګډون وکړي.
پاکستان وايي هندوستان ته د افغانستان د روغتیا د وزیر دغه سفر په داسې حال کښې شوی دی چې د طالبانو تر مشرۍ لاندې د افغانستان حکومت سوداګران له پاکستان څخه د درملو له واردولو څخه منع کړي دي.
د هندوستان د خارجه چارو وزارت ویاند «راندیر جیسوال» نوي ډیلي ته د افغانستان د روغتیا د وزیر ورتلل تائید کړل او هغه د افغانستان د پلاوي تود هرکلی وکړ.
جیسوال وویل د افغانستان د پلاوي دغه سفر د افغانستان د روغتیا د نظام لپاره د هندوستان د پایداره ملاتړ ښودنه کوي او مونږ د رغنده خبرو اترو هیله کوو.
څرنګه چې له پاکستان سره د افغانستان اړیکې خرابې شوي دي د طالبانو حکومت هڅه کړې ده چې له هندوستان سره نږدې اړیکې جوړې کړي.
د افغانستان او د پاکستان ترمینځ مهه مسله له سرحد ورهاخوا ترهګرۍ ده او پاکستان وايي چې د افغانستان له خاورې په پاکستان بریدونه کیږي خو طالبان د پاکستان تورونه په کلکه ردوي.
