د پاکستان او افغانستان ۱۹ کلنې لوبډلې سبا سره لوبه لري
د افغانستان له ۱۹ کلنو کم عمره کرکټ ملي لوبډله سبا د پاکستان له ۱۹ کلنو کم عمره لوبډلې پر وړاندې یو ورځنۍ سیالي لري.
یاده لوبه د زمبابوې په پلازمېنه هراري ښار کې ترسره کېږي.
دا سیالي د افغانستان، پاکستان او زمبابوې د ۱۹ کلنو کم عمره لوبډلو ترمنځ د درې اړخیزو لوبو د لړۍ برخه ده.
دا لوبې د ۱۹ کلنو د کرکټ نړیوال جام ته د چمتووالي په موخه ترسره کېږي.
د دغې لړۍ لومړۍ لوبه تېره ورځ پنجشنبه د افغانستان او کوربه زمبابوې ترمنځ ترسره شوه، چې پکې افغان توپاچوونکو د زمبابوې ټول لوبغاړي په ۹۰ منډو له میدانه بهر کړل.
په ځواب کې افغان لوبډلې ۶۸ منډې وکړې او یو لوبغاړی یې له لاسه ورکړ، خو د باران له امله لوبه بې پایلې پای ته ورسېده.
د یادونې وړ ده، چې له ۱۹کلنو د کرکټ نړیوال جام سیالۍ به د راتلونکي جنورۍ میاشتې په نیمايي کې د زمبابوې او نمیبیا په کوربتوب پیل شي.
