د افغانستان د سوداګرۍ کچه 13.9میلیارډ ډالرو ته ورسېده
په ۲۰۲۵ کال کې د افغانستان د سوداګرۍ ټولیزه اندازه ، سره له دې چې ګڼ خنډونه موجود وو ، ۱۳٫۹ میلیارډ ډالرو ته ورسېده او صادرات او واردات دواړه زیات شول.
د تسنیم خبري اژانس د راپور له مخې، د افغانستان د طالبانو د حکومت د صنعت او سوداګرۍ وزارت په خپل تازه راپور کې اعلان کړی چې په تېر میلادي کال کې د افغانستان صادرات او واردات، سره له هغو ستونزو او ننګونو چې د سوداګریزو لارو د تړل کېدو له امله رامینځته شوي وو، منفي اغېزې نه دی درلودلي او د تېر کال په پرتله ئې زیاتوالی درلود.
راپور زیاتوي چې د ۲۰۲۵ میلادي کال پر مهال د افغانستان د سوداګرۍ ټول ټال اندازه ۱۳ میلیارډ او ۹۳۲ میلیونه ډالرو ته لوړ شوی، چې له هغو څخه ۱ میلیارډ او ۸۰۷ میلیونه ډالر صادرات او کابو ۱۲ میلیارډ او ۱۲۵ میلیونه ډالر واردات جوړوي.
ددغه وزارت په اعلامیې کې راغلی دي ، د افغانستان د صادراتو لویه برخه د هند، پاکستان، ازبکستان، متحده عربي اماراتو، قزاقستان، ایران، ترکیې، چین، عراق او تاجکستان له بازارونو سره ترسره شوې ده.
راپور همداراز منلې چې د افغانستان د وارداتو اصلي بازارونه ایران، متحده عربي امارات، پاکستان، چین، ترکمنستان، ازبکستان، روسیه، قزاقستان، مالیزیا او هند دي، او د وارداتو عمده توکي تجهیزات او د ګاډو پرزې، تیلی محصولات، غلې دانې، برقي تجهیزات او ماشینآلات، د پنبې ټوکر ، نباتي غوَړي، سمنټ، مصالحې، وريجې، بوره، لبنیات او د مصرف وړ کالي دي.
سره له دې چې د افغانستان او پاکستان ترمینځ سوداګریزې لارې له محدودیتونو او خنډونو سره مخ دي، د طالبانو چارواکو تل ټینګار کړی چې د دغو لارو بیا پرانیستل یوازې هغه وخت شوني دي چې د ناوړه استفادې او سیاسي دباؤ د مخنیوي لپاره لازم تضمینونه موجود وي. له همدې امله، د سوداګرۍ د حجم د زیاتوالي او د صادراتو او وارداتو د ودې تر څنګ، د سوداګرو د ګټو ساتنه او د خلکو د اقتصادي اړتیاوو پوره کول لومړیتوب ګڼل کېږي.
د طالبانو د حکومت ویاند ذبیحا....مجاهد» تر دې وړاندې له پاکستان سره د سوداګریزو لارو د پرانیستلو په اړه د افغانستان دریځ روښانه کړی و او خبرداری ئې ورکړی و چې د پاکستان له لورې د سوداګریزو او ټرانزیتي لارو غیر قانوني تړل او له دې لارو د سیاسي او اقتصادي دباؤ د وسیلې په توګه کار اخیستل، د دواړو هېوادونو خلکو او سوداګرو ته جدي زیانونه اړولي دي.
