یوناما: افغانستان کې د جګړې د ناچادو توکو ډېری قربانیان ماشومان دي

په افغانستان کې د ملګروملتونو د مرستندویه ماموریت دفتر (یوناما) ویلي چې ماشومان د جګړې له پاتې شونو د چاودنو له امله تر ټولو زیات زیانمن کېږي او د ټولو تلفاتو شاوخوا ۸۰سلنه جوړوي.

یوناما پرون (سه‌شنبه، د سلواغې په ۱۴مه) پر خپله رسمي فیسبوک‌پاڼه لیکلي چې افغانستان د جګړې له پاتې مهماتو د چاودنو له امله د لوړې مرګ‌ژوبلې له پلوه په نړۍ کې درېیم هېواد دی.

د دې ادارې د معلوماتو له مخې، ماشومان ډېری وخت د لوبو پرمهال یا له ناچاودو مهماتو سره د تماس پرمهال قرباني کېږي.

یوناما ټینګار کړی چې عامه پوهاوی او د ماین‌پاکۍ په برخه کې جدي اقدامات کولی شي، د افغانستان د زرګونو وګړو ژوند وژغوري.