هندوستان خپل پوځي ځواکونه افغانستان ته لیږي

یوې پاکستاني رسنۍ ادعا وکړه چې ښايي هندوستان خپل پوځي ځواکونه افغانستان ته ولیږي.

د پاکستان آبزرور ورځپاڼې په لیکنه د هندوستان د ملي امنیت سلاکار اجیت دووال له افغانستانه غوښتي دي چې په دې لړ کښې له نوي ډیلي څخه په رسمي ډول غوښتنه وکړي.

د دغې ورځپاڼې په ادعا، دا خبره د ماسکو د امنیتي غونډې په ترڅ کښې د افغانستان د ملي امنیت له سلاکار حنیف اتمر سره د اجیت دووال په وروستۍ کتنه کښې شوې ده.

د پاکستان آبزرور په لیکنه، د هندوستان د دفاع له څيړنیزې موسسې څخه جنرال ګورمیټ کانوال هم واشنګټن ته تللی څو افغانستان ته د خپل هیواد د پوځیانو د احتمالي لیږد زمینه برابره کړي.