د بايوميټرک يو شمېر مشينونه او ميموري کارډونه بې درکه شوې دي
د افغانستان د ټاکنو خپلواک کمیسيون وايي، په پلازمېنې کابل او يو شمېر نورو سيمو کې د بايوميټرک ماشينونه او ميموري کارډونه نادرکه شوي دي.
د افغانستان د ټاکنو کميسيون غړي مولانا عبدا... پرون په کابل خبري غونډې ته وويل چې يوازې کابل کې د بايو ميټرک اووه ماشينونه ورک شوي او زورواکانو د ۲۲ بايوميټرک ماشينونو ميموري کارډونه غلا کړي دي.
ښاغلي عبدالله زياته کړې، چې پر کابل سربېره په نورو سيمو کې هم د بايوميټرک ماشينونه نادرکه شوي او د رايې اچوونو د دې مرکزونو د رايو شمېر په اړه به وروسته پرېکړه کيږي.
د ټاکنو کميسيون ياد غړي زياته کړې، چې تر اوسه د ۲۱زرو مرکزونو رايې ور رسېدلي او د ۶ زرو مرکزونو رايې سکین شوې دي.
نوموړي زياته کړې، چې د ۲۲ زرو مرکزونو رايې کابل ته رارسېدلي او د نورو ولايتونو حساس مواد به هم ډیر زر کابل ته ورورسېږي.
ښاغلي عبدالله ټينګار کړی چې د بايوميټرک ماشينونو له رسېدو وروسته به په دوو مرحلو کې ټولې رايې پاکې شي.
د هغه په وينا په لومړۍ مرحله کې به بايوميټرک او غیر بايوميټرک رايې سره جلا کړي او ورپسې به د بايوميټرک شوو رايو کې د نورو تخنيکي ستونزو څېړنه وکړي.
مولانا عبدالله وويل، د ټاکنو لومړنۍ پایلې به د تلې مياشت په ۲۷مه اعلان شي.
