د تهران د جُمعې خطيب:
ستومانه کؤنکې خبرې اترې نه منوو
د تهران د جُمعې د نمانځه خطيب وويل: مونږ په داسې خبرو کښې شرکت کوو چې نتيجه يې د ټولو بنديزونو خاتمه وي او ايران ستومانه کؤنکې خبرې اترې نه قبلوي.
د ايران پرېس د رپوټ له مخې آيت الله سيد احمد خاتمي پرون په تهران په پوهنتون کښې د جُمعې عبادي – سياسي نمانځۀ په غونډه کښې تاکيد وکړ: د امريکه مرده باد نعره د ايران د ملت يوه سپېځلې نعره ده ځکه چې د دغه رژيم دوسيه د ايران د خلقو په نزد توره ده او په ايران باندې د صدام په حمله کښې د امريکې لاس ليدل کېدې شي او له دغې حملې درې ورځې مخکښې برژېنسکي له صدام سره کتنه کړې وه.
د تهران د جمعې موقته امام آيت الله سيد احمد خاتمي زياته کړه، د دغو خباثتونو او دښمنيو دوام په تېرو ورځو کښې د امريکې لخوا د ايران د تېلو غلا کول دي او خلق په دې وجه امريکه مرده باد نعرې وهي.
هغه د ځينو هغو هېوادونو په اړه چې د امريکې په جرائمو کښې شريک دي او تل ايران ګواښي وويل: د ښۀ همسايه توب او له ګاونډيانو سره د ښۀ سلوک سياست زمونږ په مکتب کښې ارزښت لري، ګاونډيانو ته وايوو چې ايران ستاسو د ګاونډي په توګه په سيمه کښې وړومبنے فوځي قوت دے نو له ښۀ او مقتدر ګاونډي سره د ورورولۍ چلند کوئ او د دې په غېر صورت کښې به لوګے خپله ستاسو سترګو ته ورشي او له غاصب صهيونېسټ رژيم سره به يوشان تباه شئ.
آيت الله خاتمي د ايران په خلاف د امريکې د دسيسو په اړه وويل: امريکه د 1332 هجري نمريز کال د زمري له مياشتې نه واخلې تر ننه پورې په نړيوالو ټولنو کښې د ايران د خلقو په خلاف دسيسې جوړوي او د امريکې د ټولو ولسمشرانو په دورانونو کښې د جنګ تپل او د صهيونېسټ رژيم مدام پياوړي کول له دغو دسيسو څخه دي.
د تهران د جمعې د نمانځه امام همدارنګ د عمان په سمندر کښې د ايران د تېلو په غلا کولو کښې امريکې فوځ ته د ايران د پاسدارانو د لښکر د سمندري ځواک ګوزار ورکولو ته په اشارې سره وويل: دغه حرکت د امريکې د سپکاوي لپاره ؤ او وې ښودله چې امريکه او د هغې فوځ د جولاګي په ژاله کښې ناست دي.
