د ایران او قطر خارجه وزیرانو ټیلیفوني خبرې وکړې
د ایران او قطر د بهرنیو چارو وزیرانو بیګا د دواړو هیوادونو د دلچسپۍ وړ موضوعاتو په هکله د ټیلیفون پر مټ خبرې اترې وکړې
د ایران پریس د خبر له مخې حسین امیر عبداللهیان او محمد بن عبدالرحمن آل ثاني په دغو ټیلیفوني خبرو کښې د سیاسي، اقتصادي او کنسولي برخو په شمول په مختلفو برخو کښې د دواړو هیوادونو په اړیکو پورې اړوند وروستي بدلونونه وڅیړل.
د ایران د اسلامي جمهوریت د بهرنیو چارو وزیر په دغو ټیلیفوني خبرو کښې په قطر کښې د فوټبال د نړیوال کپ د سیالیو د مهمې پيښې په لړ کښې د دواړو هیوادونو د چارواکو ترمینځ تیرو خبرواترو او په دې لړ کښې د ملګرتیا زمینو ته په پام سره له خپل قطري همرتبه سره بحث او د نظر تبادله وکړه.
امیر عبداللهیان هم داشان د بندیزونو د ختمیدو مذاکراتو ته یوه اشاره وکړه او په کښې یې یوې ښې، پیاوړې او پایدارې موافقې ته د رسیدو لپاره د ایران د اسلامي جمهوریت د حکومت په هوډ باندې ټینګار وکړ.
