مقاومت د ختمېدو نه دی
د ایران د اسلامي جمهوریت د بهرنیو چارو وزیر وویل، مقاومت له منځه نه شي تلای او د اشغال ادبيات هېڅ ځای نه لري.
د ایران د اسلامي جمهوریت د بهرنیو چارو وزیر حسین امیرعبداللهیان چې لبنان ته په سفر تللی دی، پرون په X ټولنیزه شبکه کې د فلسطین د مقاومت د غورځنګ له مشرانو سره د خپلې کتنې په هکله ولیکل: نن په بیروت کې د فلسطین د حماس او اسلامي جهاد له چارواکو سره په لیدنه کې، ما په غزه او لوېدیځه غاړه کې د وروستیو پرمختګونو او د بشردوستانه اوربند او راتلونکي سناریو په اړه له جزئیاتو خبر شوم.
د ایران لوړ رتبه ډیپلومات په دوام کې ټینګار وکړ: په دې کې شک نشته چې مقاومت له منځه نه شي تلی، د ملکیانو وژل، انساني محاصره او د فلسطینیانو جبري کډه کول باید ودرول شي.
د ایران د بهرنیو چارو وزیر وویل: وخت د اسرائيلو د رژیم په ګټه نه دی، بلکې اوس وخت د سیاسي نوښتونو په ګټه دی او د ټولو تمرکز د فلسطین او د سیمې په ډله ایز امنیت دی.
هغه همداشان د امریکې چارواکو ته په خطاب کې ولیکل: سپينه ماڼۍ دې د فلسطین او لبنان د مبارزانو ۷۵ کلن تاریخ په ځېر سره ولولي او حقیقت پسندانه چلند دې وکړي. د نیواکګرۍ ادبیات د اوسنۍ نړۍ په ادبیاتو کې هېڅ ځای نه لري.
