بقایي: پر ایران د امریکا بندیزونه د بشریت پر ضد جنایت دی
پارس ټوډې – د ایران د بهرنیو چارو وزارت ویاند د ایران پر وړاندې د امریکا د مالیې وزارت له لورې د سختو بندیزونو د لګولو ګواښ، د بشریت پر ضد جنایت وباله.
د پارس ټوډې د راپور له مخې؛ د ایران د بهرنیو چارو وزارت ویاند اسماعیل بقایي، د ایران پر وړاندې د امریکا د مالیې وزارت له لورې د سختو بندیزونو د لګولو د ګواښ په غبرګون کې په ایکس ټولنیزې پاڼې کې ولیکل: «ډېر د شرم وړ دي هغه سیاستونه چې یوازینی فلسفه او دنده یې د انسانانو پر وړاندې قصدي درد او رنځ رامنځته کول دي، خو بیا هم په ویاړ سره تبلیغ او توجیه کېږي.»
بقایي په دې ټینګار وکړ چې دا چلند د غیرانساني ذهنیت څرګندونه کوي او زیاته یې کړه: د ایران پر وړاندې د امریکا د مالیې وزارت له لورې د سختو بندیزونو د لګولو ګواښ، د «اقتصادي ترهګرۍ» او «دولتي باجاخیستنې» سیاست دی چې په خپل ماهیت کې د بشریت پر ضد جنایت او نسلوژنه بلل کېږي.
