د ایران د جنوبي خراسان ولایت د صادراتو ۸۱ سلنه زیاتوالی
پارس ټوډې – د ایران د شمال ختیځ جنوبي خراسان ولایت تولیدي توکو صادرات په تېرو دوو میاشتو کې د تېر کال د ورته مودې په پرتله د وزن له مخې ۸۱ سلنه زیات شوي دي.
د پارس ټوډې د راپور له مخې، د جنوبي خراسان د ګمرکونو عمومي رئیس محمد کوهګرد وویل، د ۱۴۰۵ لمریز کال له پیل راهیسې د بیرجند، ماهیرود او د ماهیرود د سرحدي کوچني بازار له ګمرکونو څخه ۵۲۵ زره او ۲۰ ټنه تولیدي توکي د ۹۴ میلیونه، ۴۲۴ زره او ۹۳۱ امریکایي ډالرو په ارزښت بهرنیو هېوادونو ته صادر شوي دي.
هغه زیاته کړه چې د دغو صادراتو ارزښت د تېر کال د ورته مودې په پرتله ۵۱ سلنه او وزن یې ۸۱ سلنه زیات شوی دی.
کوهګرد وویل چې په دې موده کې د ولایت مهم صادراتي توکي د وسپنې بېلابېل ډولونه، سمنټ، سابه او ترکاري، هایدروکاربني مواد، د پلاستیک بېلابېل توکي، قیر او هګۍ وې.
نوموړي زیاته کړه چې د دغو توکو ډېره برخه عراق، پاکستان، افغانستان، ترکیې او ترکمنستان ته صادر شوې ده.
