د «کرار» ټانک؛ د ایران د پرمختللې زغرهوالې ټکنالوژۍ نښه
پارس ټوډی– د ایران د دفاع وزارت د دفاعي صنایعو ادارې په وروستیو کلونو کې د پوځي ځانبسیاینې او وسلو جوړونې په برخه کې مهم پرمختګونه کړي او د زغرهوالو او غیر زغرهوالو پوځي وسایطو د طرحې او تولید په برخه کې یې ستر ګامونه پورته کړي دي.
د پارس ټوډې د راپور له مخې، په دې برخه کې یو له مهمو لاسته راوړنو څخه د اصلي جنګي ټانک (MBT) «کرار» طرحه او تولید دی.
مخکتنه
کرار د ایران لومړنی پرمختللی کورنی ټانک بلل کېږي، چې د ایران د دفاع وزارت د دفاعي صنایعو ادارې له لوري په درېیو کلونو کې طرحه او جوړ شو.
دغه ټانک د ۲۰۱۷ کال د سپټمبر په ۱۲مه (د ۱۳۹۵ کال د کب په ۲۲مه) رسماً نندارې ته وړاندې شو او په همدې ورځ د لرستان ولایت د دورود ښار د «بنيهاشم» زغرهوالو صنایعو په فابریکه کې یې د تولید کرښه هم پرانیستل شوه.
د پوځي کارپوهانو په وینا، کرار ټانک د ځمکني ځواک د پوځي توان نښه ده او په اصل کې د روسي T-72 ټانک یوه پراخه او پرمختللې ایراني بڼه ده، چې په ځینو برخو کې د روسیې د مشهور T-90MS ټانک له کورنۍ سره ورته والی لري.
تخنیکي ځانګړتیاوې
کرار ټانک په یوه نوي او پرمختللي انجن سمبال دی، چې د ۱۰۰۰ تر ۱۲۰۰ اسبه ځواک تولیدوي. همدارنګه د ۱۳۰۰ اسبه ځواک لرونکي ملي ډیزلي انجن د کارولو وړتیا هم لري، چې د تولید کرښه یې مخکې پرانیستل شوې ده.
دا ټانک د کمپیوټري اور کنټرول سیسټم، پرمختللو الکترواپټیکي تجهیزاتو، د ۱۰ زره مترو واټن لرونکي لېزري واټنسنج، بالستیکي کمپیوټر او د شپې او ورځې په هر ډول شرایطو کې د ثابتو او خوځنده هدفونو د ویشتلو وړتیا لري. همدارنګه د لېزر په وسیله هدایت کېدونکي دقیق توغندي هم توغولی شي.
د هدف نیونې په برخه کې کرار د درېیم نسل کمپیوټري اور کنټرول سیستم لري. د توپچي لپاره د شپې لید سیسټم، چې د T-72 ټانک څخه اخیستل شوی، د احتیاطي سیستم په توګه کار کوي، او اصلي څوکاناله هدف نیوونکی سیستم د ایران د الکترونیکي صنایعو تولید دی.
دغه سیستم د «تندر» په نوم د لېزري هدایت لرونکي توپتوغندي د هدایت لپاره کارول کېږي، چې دا توغندی هم په ایران کې تولیدېږي.
وسلې
کرار ټانک د ۱۲۵ ملي متري توپ په وسیله سمبال دی، چې د T-72 معیاري توپ دی او د بېلابېلو مهماتو د کارولو وړتیا لري.
پر دې سربېره، یو له لرې واټن څخه کنټرولېدونکی ماشینګڼ هم پرې نصب شوی، چې عمله یې د ټانک له دننه څخه کاروي. دغه سیستم د ایران د صاایران شرکت له خوا جوړ شوی او خپلواکه اپټیکي لید او هدف نیونه لري.
دا ډول وسلې اوس مهال د نړۍ په پرمختللو ټانکونو او زغرهوالو وسایطو کې هم کارول کېږي او د ۳۶۰ درجې تاوېدو او د سپکو هدفونو د ویشتلو وړتیا لري.
نورې ځانګړتیاوې
کرار ټانک د ګڼو ډیجیټلي سکرینونو او کمرو په وسیله سمبال دی، چې عملې ته د شپې او ورځې، او د هر ډول هوا په شرایطو کې د چاپېریال د څارلو او هدف نیولو اسانتیا برابروي.
د ناوبرۍ ډیجیټلي سیستم او د ټانک د وضعیت څار سکرینونه هم پکې ځای پر ځای شوي، چې د عملې کاري فشار کموي او عملیات اسانه کوي.
د ټانک برج او زغرهوال پوښونه د T-90MS ټانک ته ورته ډیزاین لري. برج په بشپړ ډول په پرمختللې زغره پوښل شوی او د غاړو او شا برخې یې د اضافي زغرو او قفسي زغرو په وسیله خوندي شوي، چې د RPG-7 او ورته ضد زغره راکټونو پر وړاندې ښه ساتنه برابروي.
کرار د ایران په جوړ شوي لېزري خبرداری ورکونکي سیستم هم سمبال دی، چې د دښمن د لېزري هدف نیوونکو او هدایت کوونکو وسلو وړانګې کشفوي، خبرداری ورکوي او د لوګي لاسي بمونه توغوي، ترڅو د لېزري هدایت لرونکو وسلو پر وړاندې د ټانک ساتنه وکړي.
دغه ټانک د حرارتي څپو ضد ځانګړی پوښ هم لري، چې د حرارتي کامرو او لټونکو له لید څخه یې پټوي، او دا ځانګړنه د نوې ضد زغره وسلو پر وړاندې ډېر مهم رول لري.
کرار د ناهمواره سیمو، کندو، سیندونو، ډبرینو لارو او حتی د اوبو لاندې د حرکت وړتیا لري. همدارنګه د تندو ځوړونو په سیمو کې هم په لوړ خوځښت سره حرکت کولی شي.
دا ټانک د ناوبرۍ سیستم، د موټرچلوونکي لپاره د لارې ښودنې سکرین او د ماشینګڼ د اتومات کنټرول سیستم لري، چې له جنګي خونې څخه د ډزو امکان برابروي.
د بقا او ساتنې وړتیا
کرار ټانک د پرمختللې زغرې په وسیله د بېلابېلو ضد زغره وسلو پر وړاندې خوندي شوی دی. څو اړخیز استتار، پرمختللي مخابراتي سیستمونه، ډیجیټلي د جګړې د ډګر مدیریت او د الکترونیکي جګړې پر وړاندې د مقابلې وړتیا یې نورې مهمې ځانګړتیاوې ګڼل کېږي.
تخنیکي مشخصات
- وزن: ۵۱ ټنه
- اوږدوالی: ۷ متره (د بدنې اوږدوالی)، ۹.۵ متره (له توپ سره)
- پلنوالی: ۳.۷ متره
- لوړوالی: ۲.۳ متره
- عمله: ۳ کسان (قوماندان، موټرچلوونکی او توپچي)
