د ایران او عراق مشرانو د سټراټیژیکو ملګرتیاؤ پر ژورتیا ټینګار وکړ
پارس ټوډې – د ایران د اسلامي جمهوریت او د عراق مشرانو د دواړو هېوادونو ترمینځ پر ژورو تاریخي، کلتوري، دیني او ولسي اړیکو د ټینګار ترڅنګ، د دغې ارزښتمنې پانګې پر ساتنې او پیاوړتیا د سټراټیژیکو همکاریو د پراختیا لپاره د مهم بنسټ په توګه ټینګار وکړ.
د پارس ټوډې د راپور له مخې، د ایران د اسلامي جمهوریت ولسمشر مسعود پزشکیان په تهران کې د عراق له لومړي وزیر علي فالح الزیدي سره، چې د یوه لوړپوړي پلاوي په مشرۍ ایران ته ئې سفر راکړی، وکتل او د دواړو هېوادونو د ګډو ګټو مهمو موضوعاتو او د دوهاړخیزو اړیکو د پراختیا او ژورتیا د لارو چارو په اړه ئې سره خبرې او د نظر تبادله وکړه.
د ایران ولسمشر او د عراق لومړي وزیر د دواړو هېوادونو ترمینځ شویو ګډو هوکړو ته په اشارې وویل، د دغو هوکړو د بشپړ عملي کېدو چټکتیا د اړیکو د پیاوړتیا او د متقابلو ګټو د تأمین لپاره یو مهم ګام دی.
دواړو لورو د سیاسي، اقتصادي، سوداګریزو، ټرانزیټي، انرژۍ او سیمهییزو ملګرتیاؤ په برخو کې د ګډو ظرفیتونو پر فعالولو هم ټینګار وکړ.
د ایران او عراق مشرانو همدارنګه د دوامدارې همغږۍ او نږدې همکارۍ اهمیت ته په اشارې، د همکاریو د نویو افقونو پر پرانیستلو د دواړو هېوادونو د راتلونکو اړیکو لپاره د یوې سټراټیژیکې اړتیا په توګه ټینګار وکړ.
دوي څرګنده کړه چې د هر اړخیزو اړیکو پراختیا به نه یوازې د دواړو هېوادونو ثبات، امنیت او هوساینه پیاوړې کړي، بلکې د دواړو وروڼو ملتونو د ګډو ګټو د تأمین او د سیمې د یووالي او همغږۍ د ټینګښت په برخې کې به هم مهم رول ولوبوي.
