د ایران په خلاف د سعودیانو د ادعا تکرار
سعودی عربستان یو ځل بیا په تکراری او بې بنیاده ادعا کښې د ایران اسلامی جمهوریت د سیمې د هېوادونو په کورنو چارو کښې په مداخلت تورن کړ.
زمونږ د خبریال د رپوټ له مخې په ملګرو ملتو کښې د سعودی دائمی پلاوی په یمن باندې د تیری ګرو فوځی کارپېژاندو په غونډه کښې د تکراری ادعا ګانو په وړاندې کولو سره په خپل ګمان د یمن په شمول په سیمه کښې د ایران د مداخلت د اودرولو غوښتنه وکړه.
څو ورځې مخکې هم د اماراتو د بهرنیو چارو سلاکار وزیر انور قرقاش په یوه وېنا کښې په دې ادعا سره چې ایران د سعودی ضدو تحرکاتو په چوکاټ کښې د یمن حوثیانو ته وسلې لېږی ادعا وکړه چې ایران په سیمه کښې خپلو مداخلتونو ته دوام ورکوی.
د ایران د بهرنیو چارو د وزارت ویاند بهرام قاسمی د دغو تورونو په ردعمل کښې تاکید کړے دے چې ډېره د حېرانتیا او افسوس خبره ده چې هغه هېواد چې تقریباً دوه کاله وشول د یمن د بنسټیزو ودانیو په ویجاړولو، د جنګی جنایتونو په کولو او د خلقو په ظالمانه محاصرې کښې نېغ په نېغه رول او مسئولیت لرلے نور په یمن کښې په مداخلت تورنوی.
امارات، سعودی او د یمن د مستعفی حکومت مسئولان په داسې حال کښې وخت په وخت ایران یمن ته د وسلو په لېږلو تورنوی چې په ګډه توګه یې د 2015 کال له مارچ څخه په دغه هېواد کښې ماتې خوړلې ده او په دې موده کښې یې د یمن د خلقو په خلاف مختلف جنایتونه ترسره کړی دی.
سعودی په امریکائی او برطانوی وسلو سره د یمن په بې ګناه خلقو هوائی حملې کوی چې دغه حملې د بشریت په خلاف د جنایت او د جنګی جرم مصداق دی.
