روحانی: ایران د دښمنانو لخوا د ګوښه کېدو تپل نه منی
د ایران د اسلامی جمهوریت ولسمشر ډاکټر حسن روحانی وویل: د ایران اسلامی جمهوری نظام که څه هم د عزتمندۍ لپاره د هېواد د خپلواکۍ قیمت ادا کړے او ادا کوی یې خو د دښمنانو لخوا د ګوښه کېدو تپل به هیڅکله ونه منی.
د ولسمشرۍ د اطلاع رسونې د سائیټ د رپوټ له مخې ډاکټر حسن روحانی نن د اسلامی انقلاب د معظم رهبر حضرت آیت الله العظمی خامنه ای لخوا د ایران د اسلامی جمهوریت د ولسمشرۍ د حکم له تنفیذه وروسته وویل: ایران په نړیوال نظام کښې د فعاله ګډون نه کولو لپاره د بدخواهانو غوښتنې ته نه تسلیمیږی او د بشری تجربې له بدلونونو او لاسته راوړنو څخه لرې پاتې کېدل به هم ونه منی.
روحانی د دې په بیانولو سره چې د ګډ اقدام بشپړه پروګرام یعنې برجام په نړیواله سطح کښې د رغانده او موثره تعامل لپاره د ایران د اسلامی جمهوریت د روغ نیت نښه وه زیاته کړه:ایران اوس په ځان باندې په اعتماد سره له مخکې نه زیات د یو ملت چې د 2017 روان میلادی کال د مۍ د نولسمې د انتخاباتو ستره حماسه یې رامنځته کړه په ملاتړ سره د اساسی قانون په چوکاټ کښې له نړۍ سره په رغانده او موثره تعامل باندې تاکید کوی.
هغه دې ته په اشارې سره چې د ایران اسلامی جمهوری نظام د خلقوپه رایو باندې تکیه لری څرګنده کړه: د خلقو شتون د دې سبب کیږی چې د ایران اسلامی جمهوری نظام له بندون سره مخامخ نه شی.
