ایران او هندوستان د خپل منځیو اړیکو پراختیا غواړي
د هندوستان د بهرنیو چارو وزیرې نن په تهران کښې د ایران د اسلامي جمهوریت له خارجه وزیر سره ملاقات او خبرې اترې وکړې.
د فارس خبري آژانس د خبر له مخې سشما سوارج په دغه کتنه کښې د ایران له اسلامي جمهوریت سره د هندوستان د اړیکو په اهمیت او د هغو د ژورتیا او پراختیا په ضرورت ټینګار وکړ.
په دغه کتنه کښې د ایران د بهرنیو چارو وزیر محمد جواد ظریف هم د ایران او هند مخ په پراختیا او ښو اړیکو ته په اشارې سره څرګنده کړه: د چابهار د شهید بهشتي بندر افتتاح د دوه اړخیزو او سیمه ایزو ملګرتیاو د پیاوړتیا نه علاوه په سیمه ایزه پراختیا او د عمان سمندر او هند سمندر له لارې د نړۍ له نورو هیوادونو سره د مرکزي آسیا د هیوادونو په ارتباطي لارو کښې د دې بندر د اهمیت ښودونکی دی.
ټاکل شوې چې د ایران د اسلامي جمهوریت ولسمشر حسن روحاني سبا د نړۍ د ۲۷ هیوادونو د چارواکو په ګډون سره په چابهار کښې د شهید بهشتي نومي بندر د وړومبي فاز پرانسته وکړي.
ولسمشر حسن روحاني نن د سیستان او بلوچستان ولایت زابل او مرکز زاهدان ته تللی او سبا به د همدغه ولایت چابهار ښار ته ځي.
