د ایران په چابهار بندر کښې تجارتي عملیات پیل شول

د هندوستان د بیړۍ چلونې وزارت د ایران په چابهار بندر کښې د سوداګري عملیاتو د پيلیدو خبر ورکړ.

د ایرنا په لیکنه، د هندوستان د بیړۍ چلونې وزارت پرون په یوه خبرپاڼه کښې وویل: سر له نن څخه مو د ایران په چابهار بندر کښې خپل تجارتي عملیات په رسمی توګه پیل کړي دي.

په دغه بیانیه کښې راغلي دي: د ۲۰۱۸ کال د دسمبر په ۲۴ نیټه د ایران په سیستان او بلوچستان ولایت کښې د چابهار د درې اړخیزې موافقې د غونډې له مخې د هند حکومت د چابهار د شهید بهشتي بندر د یوې برخې د جوړولو عملیات په غاړه اخیستې دي.

له دې مخکښې د ایران، هندوستان او افغانستان استازو په چابهار کښې د هند د بندرونو د آزادې سیمې د دفتر پرانیسته کړې وه.