چین یوځل بیا د برجام د اجرا په ضرورت ټینګار وکړ
د چین د خارجه وزارت ویاند وویل: بیجنګ د ګډ اقدام د جامع پروګرام (ایټمي موافقې) په ساتنې او د دغې نړیوالې موافقې د مفادو د اجرا په ضرورت جدي ټینګار لري.
ایرنا لیکلي چې ګنګ شوانګ پرون په یوه خبري غونډه کښې ټینګار وکړ: برجام د یوې څواړخیزې موافقې په توګه چې د ملګرو ملتو امنیت شورا هم تاییده کړې، په لویدیځې آسیا کښې د صلحې او ثبات لپاره یوه ډیره مهمه موافقه ده او باید په هراړخیزه او موثره توګه اجرا شي.
د چین د بهرنیو چارو د وزارت ویاند زیاته کړه: له برجامه د امریکې وتل او د ایران خلاف د واشنګټن د یواړخیزو بندیزونو پیلیدل په سیمه کښې د حالاتو د خرابیدو سبب شوي او له امله یې چین خواشینی دی.
هغه د امریکې او ایران ترمینځ د موجودو اختلافاتو د هواري یوازنی لاره، خبرې اترې وبللې او ویې ویل: بیجنګ د انرجۍ په بازار کښې له سخت ګډوډي یا په لویدیځه آسیا کښې د حالاتو له خرابیدو سره سخت مخالف دی او په ایټمي موافقه کښې به پر خپلو ژمنو هم هغه شان پابند پاتې شي.
