پاکستان بنګله دیش ته دویمه ماتې ورکړه

په بنګله دیش کښې د دغه هیواد او پاکستان د کرکټ د ملي لوبډلو ترمینځ د ټي ټوینټي په روانو سیالیو کښې نن دویمه لوبه وشوه

د بنګله دیش او پاکستان د کرکټ ټیمونو ترمینځ د دریو سیالیو د سیریز په لړ کښې نن پاکستان پرله پسې دویمه لوبه وګټله.

بنګله دیش د خپل بیټنګ په وار په ټاکلو شلو اوورونو کښې د ۷ لوبغاړو په سوځیدو سره ۱۰۸ منډې جوړې کړې.

په ځواب کښې د پاکستان ټیم یوازې د دوو لوبغاړو په آوټ کیدو سره ټاکلی هدف د نولسم اوور په وړومبي بال پوره کړ.

پاکستان په بنګله دیش کښې د روانو ټي ټوینټي سیالیو په وړومبۍ لوبه کښې هم کوربه هیواد ته ماتې ورکړې وه او داشان په سیریز کښې په ۲-۰ نتیجې سره مخکښې دی.

د دې لړۍ دریم میچ د راتلونکې ګل په ورځ یعنې دوشنبې ته کیدونکی دی.