د پاکستان د ملي امنیت صلاحکار افغانستان ته ځي

پاکستاني چارواکو افغانستان ته د ملي امنیت د صلاحکار د سفر د پروګرام خبر ورکړی دی

د پاکستان د پارلیمان د مشر اسد قیصر په مشرۍ په اسلام آباد کښې د افغانستان د بدلونونو د څیړنې لپاره د پاکستان د جګ پوړو چارواکو په غونډه کښې وټاکلې شوه چې د دغه هیواد د ملي امنیت صلاحکار موید یوسف د حالاتو د څیړنې په موخه کابل ته لاړ شي.

دا په افغانستان باندې د طالبانو له واکمنیدو راهیسې کابل ته د پاکستان د دغه جګ پوړي چارواکي دریم سفر دی.

په دې وروستیو اونیو کښې د پاکستان او افغانستان ترمینځ د سرحدي شخړې په زیاتیدو سره، طالبانو د دواړو هیوادونو په ګډه پوله کښې د پاکستان له خوا لګولی کنډه تار راغونډ کړی دی.

پاکستاني چارواکي او طالبانو اوس غواړي چې دا مسئله په سفارتي توګه هواره کړي.