پاکستان له ایران سره د دوه اړخیزو اړیکو پر پیاوړتیا ټینګار وکړ
د پاکستان د مشرانو جرګې د دفاعي چارو د کمېټې مشر، په ګډ سرحد کې د تهران او اسلام آباد د مشرانو د وروستۍ غونډې پر ارزښت په ټینګار سره ویلي: د ایران له اسلامي جمهوریت سره د اړیکو ټینګول د پاکستان د امنیت او د انرژۍ د ګټو ضمانت کوي.
د ایرنا د خبر له مخې، د پاکستان د مشرانو جرګې د دفاعي کمېټې مشر ویلي: د پاکستان د مشرانو جرګې د دفاعي کمېټې غړي، د سرحدي سیمو د امنیت د ټینګولو لپاره د سوداګرۍ او اقتصادي اړیکو د ډاډ په موخه، د پاکستان له خوا د ترهګرۍ ضد د یوې فعالې ستراتیژۍ پر اړتیا ټینګار کوي.
د پاکستان د مشرانو جرګې د دفاعي کمېټې مشر، سناتور مشاهد حسین ټینګار کړی، چې له ایران سره د دوه اړخیزو اړیکو پیاوړتیا، د انرژۍ او د سرحدي امنیت په برخو کې د پاکستان د ګټو ضمانت کوي او دا هغه موضوع ده چې اسلام آباد ورته ډېر ارزښت ورکوي.
مشاهد حسین همداراز ایران ته د پاکستان د لوړ پوړو امنیتي او ډیپلوماتیکو چارواکو د وروستیو سفرونو هرکلی کړی او ویلي دي، چې دغه سفرونه به د دواړو ګاونډیانو ترمنځ د سولې، سرحدي امنیت او اقتصادي اړیکو لپاره مثبتې پایلې ولري.
