پر یمن بمباري د سیمې وضعیت پېچلی کوي
پارس ټوډې - د پاکستان د بهرنیو چارو وزارت ویاند د یمنیانو ترمنځ د خبرو اترو له ملاتړ څخه د خپل هېواد پر درېځ باندې ټینګار وکړ او خبرداری یې ورکړ چې پر یمن بمباري او غچ اخیستونکي اقدامات د سیمې وضعیت پېچلی کوي.
د پارس ټوډې د راپور له مخې، شفقت علي خان پرون په اسلامآباد کې په خپل اونیز کنفرانس کې وویل چې د پاکستان ستراتیژیک پروګرامونه دفاعي ماهیت لري او دا د دې هېواد د دفاع یوه مهمه برخه ده.
هغه ټینګار وکړ: د اسرائیلو په اړه د پاکستان موضوع څرګنده ده او موږ دا رژیم په رسمیت نه پېژنو.
د پاکستان د بهرنیو چارو وزارت ویاند د یمن د خلکو پر وړاندې د امریکا او بریتانیا د یرغلونو په اړه د یوې پوښتنې په ځواب کې وویل چې پر دې هېواد بمباري او تر هغه وروسته غچ اخیستونکي اقدامات د سیمې وضعیت نور هم پیچلی کوي.
هغه زیاته کړه چې پاکستان د یمن د کړکېچ د حل لپاره د سولې او د یمنیانو ترمنځ د خبرو اترو له بهیر څخه ملاتړ کوي.
شفقت علي خان د فلسطین اشغال شویو سیمو ته د یوې ډلې د سفر په اړه چې ځیني پاکستاني اتباع هم پکې شتون لري وویل چې د پاکستان حکومت د دې سفر په اړه رسمي معلومات نه لري او موږ د رسنیو له لارې د دې سفر په اړه خبر شو.
هغه وویل چې په دې پلاوي کې د پاکستاني اتباعو له خوا د فلسطین اشغال شویو سیمو ته د سفر لپاره کارول شویو پاسپورټونو په اړه ( دې ته په پام سره چې د پاکستان په پاسپورټ کې اشغال شویو سیمو ته سفر منع دی) هېڅ معلومات نشته او موږ د معلوماتو د راټولولو په حال کې یو.
