په پاکستان کښې افغان مهاجرو ته د اوسېدو نور مهلت ورکړے شو

پاکستان اعلان وکړچې هغه افغان مهاجرین چې نومونه یې رجسټر شوی دی تر دوو نورو کلونو پورې په دغه هېواد کښې اوسېدې شی.

زمونږ د رېډیو د رپوټ له مخې په پاکستان کښې له یو نیم میلینو زیات افغان مهاجرین رجسټر شوی دی او شناختی کارډونه لری او د دغو کارډونو د اعتبار موده د روان کال د جون تر آخره پورې ختمیږی خو د اسلام آباد د حکومت د نوې فېصلې له مخې مهاجرین به اجازه ولری چې د دوو نورو کلونو لپاره په پاکستان کښې پاتې شی.

د پاکستان حکومت وائی چې د هغو مهاجرینو شمېر چې نومونه یې رجسټر شوی نه دی له رجسټر شویو مهاجرینو زیات دے.

په عېن حال کښې د پاکستان چاپ ډان ورځپاڼې ولیکل چې پرون د پاکستان پوله ایزو چارواکو شپږ پنځوس افغانان د تورخم په پوله کښې افغان پوله ایزو ځواکونو ته وسپارل.