پاکستان: له افغانستان سره اوربند نه ټینګېږي
پاکستان د جمعې په ورځ وویل چې له افغانستان سره اوربند «نه ټينګېږي» ځکه چې د ترهګرو ډلو بریدونه په پاکستان کې لا هم روان دي.
د پاکستان د بهرنیو چارو وزارت ویاند طاهر اندرابي په اسلام اباد کې خبري کنفرانس ته وویل چې د پاکستان او افغان طالبانو ترمنځ اوربند د دودیز پوځي اوربند په معنا نه وو، بلکې هدف یې دا وو چې د پاکستان دننه د تروریستي بریدونو مخه ونیول شي.
ده زیاته کړه: «له دې اوربنده وروسته هم لوی تروریستي بریدونه شوي دي. د دې معنا دا ده چې اوربند نه دی ټینګ شوی، ځکه د اوربند موخه دا وه چې د ټي ټي پي او هغو افغان اتباعو بریدونه ودرول شي چې له افغان خاورې څخه د پاکستان دننه بریدونه ترسره کوي.»
اندرابي دا څرګندونې وروسته له دې وکړې چې د افغانستان پر درېیو ولایتونو؛ خوست، کونړ او پکتیکا په بمبارۍ کې د ۹ ماشومانو په ګډون تر لسو ډېر کسان ووژل شول.
د طالبانو حکومت دا بمباري د پاکستان کار وباله او ویې ویل چې په مناسب وخت کې به مناسب ځواب ورکړي، خو پاکستان وویل چې دوی بمباري نه ده کړې.
د پاکستان د بهرنیو چارو وزارت ویندوی اندرابي وویل چې اسلاماباد د وروستیو ترهګریزو پېښو په رڼا کې، په ځانګړې ډول په پلازمېنه اسلاماباد او نورو برخو کې، «دې اوربند ته ډېره هیله نه لري.»
