هند د خپل جاسوس د ژوند په سر پاکستان ته خبردارئ ورکړ
د هندی رسنیو د راپور په اساس، د هند حکومت پاکستان ته خبردارئ ورکړ چې که هندی تبعه کلبوشن یادیو ته یې د مرګ سزا ورکړه، پاکستان به یې سختې پایلې ووینی.
د پاکستان یوې پوځی محکمې د اپریل په لسمه، کلبوشن یادیو ته د مرګ سزا واوروله.
د هند د بهرنیو چارو وزیرې سوشمه سواراج د پاکستانۍ محکمې له خوا د هندی تبعه محاکمه غیر عادلانه وګڼله او ویې ویل چې که پاکستان داسې څه وکړی چې د کلبوشن ژوند ته خطر وړاندې کړی، هند به ډیر مخکښې لاړ شی.
سوشمه وویل: زه د پاکستان حکومت ته خبردارئ ورکوم چې که په دې موضوع کښې مخکښې ځی، زمونږ د دوه اړخیزو اړیکو پایلې دې په پام کښې ونیسی.
پاکستان وایی چې هندی تبعه کلبوشن په پاکستان کښې استخباراتی فعالیتونه کول، په داسې حال کښې چې د هند د کورنیو چارو وزیر راجنت سنګ وایی چې کلبوشن یو سوداګر دی او له ایران سره یې سوداګریزې چارې پرمخ بوولې چې پاکستانی امنیتی ځواکونو وتښتاوه.
