امریکايي سینیټر د پاکستان د جنوبي وزیرستان کتنه وکړه
مک کین همداشان د کشمیر د کنټرول لاین د لیدو نیت هم درلود خو د موسم د خرابوالي په وجه دغه سفر ونه شو.
د امریکې د سینیټ د وسله والو ځواکونو د کمیټې مشر د پاکستان د پوځ له قومندان سره یوځاې د دغه هیواد په خیبرپښتونخوا صوبه کښې د جنوبي وزیرستان کتنه وکړه.
د سینیټر جان مک کین په مشرۍ د امریکې د سینیټ د وسله والو ځواکونو د کمیټې یو پلاوي پرون د پاکستان د پوځ د قومندان قمر جاوید باجوا په ملتیا په جنوبي وزیرستان کښې د ترهګرۍ خلاف د دغه هیواد د عملیاتو د سیمې هوايي کتنه وکړه.
دا په تیر یو کال کښې د پاکستان خیبرپښتونخوا صوبې ته د جان مک کین دویم سفر دی. هغه د تیر کال په جولایۍ میاشت کښې هم د امریکې د سنا د یو پلاوي په ملتیا د شمالي وزیرستان کتنه کړې وه.
مک کین همداشان د کشمیر د کنټرول لاین د لیدو نیت هم درلود خو د موسم د خرابوالي په وجه دغه سفر ونه شو.
مک کین وړمه ورځ پاکستان ته تللی او د په بهرنیو چارو کښې د دغه هیواد د وزیراعظم له سلاکار سرتاج عزیز سره یې هم کتلي دي.
ټاکل شوې چې د امریکې د سینیټ د وسله والو ځواکونو د کمیټې مشر نن افغانستان ته لاړ شي.
