له ايران سره د دوو اړخيزو تعلقاتو په پراختيا د پاکستان تاکيد
د پاکستان خارجه وزير د اسلام آباد او تهران ترمېنځ د دوو اړخيزو تعلقاتو د پراختيا په لازموالي تاکيد وکړ.
د فارس خبري اژانس د رپوټ له مخې شاه محمود قرېشي پرون په اسلام آباد کښې د پاکستان د وزيراعظم عمران خان د حکومت د سلو ورځو دکارکردګۍ د بيانولو په مراسمو کښې په خپله وېنا کښې د بهرني سياست په اړه وويل، د ايران اسلامي جمهوريت د پاکستان ښه دوست دے او اسلام آباد له تهران سره ښه تعلقات لري.
د پاکستان خارجه وزير د ايران له اسلامي جمهوريت سره د تعلقاتو پراختيا د اسلام آباد لپاره اهميت لرونکې وبلله او زياته يې کړه، له ګاونډي هېوادونو په تېره بيا له ايران سره د تعلقاتو پراختيا او د تجارت د اندازې زياتول د عمران خان د حکومت ترجيح ده.
قرېشي همدارنګ چين د پاکستان لوړ مهاله سټراټيجک شريک وبلۀ او په عين حال کښې يې وويل، افغانستان د پاکستان لپاره يو مهم هېواد دے او اسلام آباد به په دغه هېواد کښې د صلحې د ټينګتيا لپاره له هيڅ کوشش څخه ډډه ونکړي.
