شاه محمود قريشي: ايران د پاکستان مسلمان ګاونډي هېواد دے

د پاکستان خارجه وزير پرون د اروپائي اتحاديې د بهرني سياست له مشرې مېرمن فيډريکا موګريني سره په ګډ اخباري کانفرنس کښې له ايران سره د دغه هېواد د تعلقاتو او ملګرتياو په اهميت تاکيد وکړ.

د تسنيم خبري اژانس د رپوټ له مخې شاه محمود قريشي په دغه ناسته کښې د دې په بيانولو سره چې د ايران اسلامي جمهوريت د پاکستان مسلمان ګاونډي او ورور هېواد دے واضحه کړه چې دواړه هېوادونه به تل د يو بل ترڅنګه ټينګ ولاړ وي.

د پاکستان خارجه وزير همدارنګ دا خبره په ګوته کړه چې د ايران اسلامي جمهوريت په افغانستان کښې د صلحې په رامنځته کولو کښې موثره او ګټور کردار ادا کولې شي.

مېرمن موګريني پرون له پاکستاني چارواکو سره د کتنې او خبرو اترو لپاره د دغه هېواد پائتخت اسلام اباد ته لاړه.